७० लाखमा पोखराको महेन्द्रपुलमा बन्नेभयो अन्तर्राष्ट्रिय झण्डा पार्क

कास्की । पोखराको महेन्द्रपुलमा अन्तर्राष्ट्रिय झण्डा पार्क निर्माण सुरु भएको छ ।

विश्वका सबै देशको झण्डा एकै ठाउँमा राखेर आन्तरिक तथा बाह्य पर्यटक आकर्षित गर्ने उद्देश्यले पोखरा महानगरपालिकाले लायन्स क्लब इन्टरनेशनल डिष्ट्रिक्ट ३२५ सँगको सहकार्यमा पार्क निर्माण थालनी गरेको हो । महेन्द्रपुलस्थित सेती नदीको डिलमा महानगरको जग्गामा निर्माण हुने सो पार्कको आज नयाँ वर्षको पहिलो दिन महानगर प्रमुख धनराज आचार्यले शिलान्यास गरे ।

प्यारापिटसहितको झण्डापार्क आगामी डेढ महिनाभित्रमा निर्माण गरिसक्ने योजना रहेको छ । पार्कमा संयुक्त राष्ट्रसङ्घमा आबद्ध एक सय ९५ देशसहित साझेदार राष्ट्रिय तथा अन्तर्राष्ट्रिय सङ्घसंस्थाको झण्डा राखिने महानगर प्रमुख आचार्यले बताए ।

उनले भने “संयुक्त राष्ट्रसङ्घमा सदस्य रहेका देश सबैको झण्डा र देशको नामसहित उल्लेख गरेर राख्नेछौँ । पार्कको बीच भागमा नेपालको सबैभन्दा ठूलो ४० मिटर अग्लो झण्डा राखिनेछ । विशेष अवसरमा झण्डोत्तोलनका लागि सोही स्थानमा कार्यक्रम गर्नेछौँ ।” झण्डा पार्क निर्माणका लागि ७० लाख लागत अनुमान गरिएको छ । सम्पूर्ण लागत रकम लायन्स क्लबले बेर्होने र यसको सञ्चालन महानगरले गर्नेछ ।

लायन्य क्लब इन्टरनेशनल डिष्ट्रिक्ट ३२५ बि १ का गभर्नर रामबहादुर वसेलले झण्डापार्कले संसारका पर्यटकलाई आकर्षित गर्ने बताए । महत्त्वपूर्ण कार्यमा लायन्स क्लब जोडिन पाउँदा खुसी लागेको उनले बताए । उनले भने, “महेन्द्रपुल पोखराको अति महत्त्वपूर्ण ठाउँ हो, यहाँ सबै क्षेत्रबाट आवातजावत हुन्छ । पोखरामा संसारबाट पर्यटक आउँछन् । यहाँ आएर झण्डा पार्क हेर्दा उनीहरूलाई गौरवबोध हुन्छ । महत्त्वपूर्ण काममा लायन्स सहभागी हुन पाउँदा खुसी छौँ । स्थानीय सरकारसँग सहकार्य गरेर पोखराका लागि काम गर्नेछौँ ।”

पोखरा–९ का वडाध्यक्ष दीपेन्द्र मर्सानीले पर्यटकीय हिसाबले झण्डा पार्कको महत्त्व हुने बताए । पोखराको लेकसाइड आउने पर्यटकहरू बजार क्षेत्र रहेको महेन्द्रपुलमा आउने र यसले पर्यटकको बसाइ लम्ब्याउन सहयोग पुग्ने उनले बताए । महानगरले केही दिनअघि महेन्द्रपुलमा नै अत्याधुनिक सार्वजनिक शौचालय निर्माणको थालनी गरेको छ । गैरआवासीय नेपाली सङ्घ (एनआरएनए) र महानगरपालिकाको एक करोड लागत साझेदारीमा सार्वजनिक शौचालय बनाउन लागिएको हो । महानगरले महेन्द्रपुलमा आफ्नो स्वामित्वमा रहेका दुई पुराना भवन भत्काएर झण्डा पार्क र सार्वजनिक शौचालय निर्माण सुरु गरेको हो ।