बागमतीमा २२ अर्ब खर्च भइसक्यो तर नदीको दुर्दशा किन उस्तैः रास्वपा सांसद डाँगी

काठमाडौं । राष्ट्रिय स्वतन्त्र पार्टीकी सांसद निशा डाँगीले बागमती र अन्य नदीको सफाइमा २२ अर्ब खर्चिएपनि अवस्था नबदलिएको भन्दै संसदमा प्रश्न उठाएकी छन्।

बिहीबार प्रतिनिधि सभाको शून्य समयमा बोल्दै डाँगीले नदी सफाइको नाउँमा वर्षेनी दुई अर्ब खर्च गरिएपनि खोलानाला जस्ताको तस्तै रहेको बताएकी हुन्।

‘बागमती लगायत अन्य नदीको दुर्दशा बदल्ने भनेर अहिलेसम्म २२ अर्ब बागमतीमा बगिसकेको छ,’ उनले भनिन्, ‘एकातिर नदी सरसफाई गर्ने भनेर वर्षेनी दुई अर्ब रूपैयाँ बढि खर्च गरिन्छ तर खोलानाला जस्ताको त्यस्तै छ।’

डाँगीले खानेपानी ऐनले मलमुत्र खोलामा मिसाए तीन महिनादेखि १ वर्षसम्म कैद, र पाँचलाख सम्मको जरिवानाको व्यवस्था गरेको स्मरण समेत गराइन्।

‘यो दण्ड जरिवानाको भागिदार को हो? ढल व्यवस्थापनको जिम्मा लिएको स्थानीय तह, अधिकारसम्पन्न बागमति सभ्यता एकीकृत विकास समिति कि स्थानीय?’ उनको प्रश्न छ।

डाँगीले नामका लागि मात्र नदी सरसफाइ नगर्न सरकारको ध्यानाकर्षण गराइन्।