अध्यक्ष ओलीसँग अमेरिकी सिनेट सदस्यको भेट, एमसिसी कार्यान्वयनबारे छलफल

 

काठमाडौ‌ । नेकपा एमालेका अध्यक्ष केपी शर्मा ओलीसँग संयुक्त राज्य अमेरिकी सिनेटको परराष्ट्र सम्बन्ध समिति र राज्य तथा वैदेशिक कार्य–सञ्चालनसम्बन्धी विनियोजन उपसमिति सदस्य सिनेटर क्रिस भान होलेनले भेटवार्ता गरेका छन् ।

सिंहदरबारस्थित एमाले संसदीय कार्यालयमा आज भएको भेटवार्तामा उनीहरुबीच शान्तिप्रक्रिया र मिलेनियम च्यालेन्स कर्पोरेसन (एमसिसी)को कार्यान्वयनबारे छलफल भएको उपाध्यक्ष्य नेम्बाङले बताए।

उनका अनुसार अध्यक्ष ओलीले नेपाल र आफू नेतृत्वको पार्टीको दृष्टिकोण राखे । “शान्तिप्रक्रिया हाम्रो सरकार हुँदाकै बेलामा टुङ्गोमा पुर्‍याउने गरी प्रयास गरेको कुरा पार्टी अध्यक्षले प्रस्टसँग राख्नुभयो”, उपाध्यक्ष नेम्बाङले भने, “अन्तर्राष्ट्रिय प्रतिबद्धता, सर्वोच्च अदालतको फैसला र शान्तिप्रक्रिया पीडितमैत्री हुने गरी टुङ्गोमा पुग्नुपर्दछ भन्ने कुरालाई ध्यानमा राखेर शान्ति प्रक्रियालाई टुङ्गोमा पुर्‍याउन हाम्रोबाट भूमिका हुन्छ, सहयोग हुन्छ । यही ढङ्गबाट हामी लाग्छौँ भनेर अध्यक्षज्यूले भन्नुभयो ।”

सिनेटर होलेनले शान्तिप्रक्रियाबारे जिज्ञासा राख्दै दुई देशबीचमा अहिले रहेको सम्बन्धलाई अझ सुमधुर हुँदै जाने विश्वास व्यक्त गरे । उजले एमसिसी नेपालले अनुमोदन गरेर कार्यान्वयन गरेको कुराले आफूहरु खुसी भएको बताएको एमाले उपाध्यक्ष नेम्बाङले जानकारी दिए ।