नेपालमा टिकटकको सक्रिय प्रयोगकर्ता करिब १४ लाख, १८ वर्षमाथिका सबैभन्दा धेरै

काठमाडौँ । स्टाट आइयो वेबसाइटका अनुसार नेपालमा १३ लाख ४९ हजार ८ सय ३० जना सक्रिय प्रयोगकर्ता रहेको देखाएको छ ।

नेपालमा रहेको  १८ वर्षदेखि २४ वर्षसम्मको ४६.८ प्रतिशत, २४ वर्षदेखि ३४ वर्षसम्मको ४७.५ प्रतिशत, ३५ वर्षदेखि ४४ वर्षसम्मको ४ प्रतिशत, ४५ देखि ५४ वर्षसम्मको १.१ प्रतिशत र ५५ वर्षदेखि माथिका ०.६ प्रतिशतले टिकट चलाउँछन् ।

सर्वाधिक रूपमा प्रयोग हुने सामाजिक सञ्जाल टिकटक नेपाल सरकारले बन्द गर्ने निर्णय गरेको छ ।

आज बसेको मन्त्रिपरिषद बैठकले टिकटक बन्द गर्ने निर्णय गरेको सरकारको प्रवक्ता एवम् सञ्चार तथा सूचना प्रविधि मन्त्री रेखा शर्माले जानकारी दिइन् । टिकटकबाट सामाजिक सद्‍भाव बिगार्ने काम गरेकाले त्यसलाई बन्द गर्ने निर्णय गरिएको हो ।

कुन कुन देशमा बन्द छ टिकटक ?

टिकटक बन्द गर्ने नेपाल एक्लो देश होइन । भारत, अष्ट्रेलिया, बेल्जियम, क्यानडा, नर्वे, न्यूजिल्याण्ड, डेनमार्क लगायतका देशले पनि टिकटक बन्द गरेका छन् ।

भारतले सन् २०२० मा नै टिकटक सहितका ५८ वटा चिनियाँ एपमाथि प्रतिबन्ध लगाएको थियो ।

चीन भारत सीमामा दुई देशबीचको सेनाबीच तनाव बढेपछि भारतले भारतको सम्प्रभुता, भारतको सुरक्षामा खतरा पैदा भएकाले टिकटक सहितका चिनियाँ एप बन्द गरेको थियो ।

सन् २०२२ मा अफगानिस्तानमा सरकारमा आए लगत्तै तालिवानले इस्लामिक कानुन विपरीत रहेको भन्दै टिकटक बन्द गरेको थियो ।

डेनमार्कले गत मार्चमा आफ्ना कर्मचारीलाई काम गर्ने डिभाइसमा टिकटक चलाउन रोक लगाएको थियो ।

अस्ट्रेलिया, बेल्जियम र क्यानडाले पनि सबै सरकारी मोबाइल डिभाइसमा टिकटक चलाउन रोक लगाएका छन् ।