वाणिज्य बैंकले घटाए ब्याज, कुनको कति ?

काठमाडौं । मंसिर महिनामा अधिकांश बैंकले ब्याजदर घटाउने भएका छन् । सञ्चालनमा रहेका २० वटा बैंकमा अधिकांशले ब्याजदर घटाउने भएका छन् भने केहीले ब्याजदर स्थिर राख्ने भएका छन् । ब्याजदर कात्तिकको तुलनामा मंसिरमा बढाउने बैंकको संख्या न्यून रहेको छ ।

बैंकहरुले कात्तिकको तुलनामा मंसिरमा व्यक्तिगत मुद्दति निक्षेपको ब्याजदर औसतमा ०.३३ प्रतिशत र संस्थागत मुद्दतीमा औसतमा ०.३० प्रतिशत विन्दुले घटाएका छन् । २० वटा वाणिज्य बैंकमध्ये १३ वटाले ब्याजदर घटाउँदा एउटा बैंकले बढाएको छ भने ६ वटा बैंकले ब्याजदर स्थिर राखेका छन् ।

मंसिरमा माछापुच्छ्रे बैंकले मात्रै ब्याजदर बढाएको छ । माछापुच्छे बैंकले मंसिरमा बचतमा ५.६० देखि ८.६० प्रतिशत ब्याज दिने जनाएको छ । मुद्दति निक्षेपमा व्यक्तिगततर्फ १०.६ प्रतिशत र संस्थागततर्फ ८.६ प्रतिशत रहेको छ । कात्तिकमा माछापुच्छ्रेले व्यक्तिगत निक्षेपतर्फ ९.९९ प्रतिशत र संस्थागततर्फ ७.४९ प्रतिशत ब्याज दिएको थियो । कात्तिकको तुलनामा मंसिरमा ब्याजदर स्थिर राख्नेमा सिटिजन्स, सिद्धार्थ, नेपाल, लक्ष्मी सनराइज, कुमारी र प्राइम कमर्सियल बैंक रहेका छन् ।

नेपाल बैंकले मंसिरमा व्यक्तिगत निक्षेपमा ९.२२ र संस्थागततर्फ ७.२२, सिटिजन्स बैंकले व्यक्तिगततर्फ ९.९५ र संस्थागततर्फ ७.९५ प्रतिशत, सिद्धार्थले व्यक्तिगततर्फ ९.९९ र संस्थागततर्फ ७.९९ प्रतिशत, लक्ष्मी सनराइजले व्यक्तिगततर्फ १० र संस्थागततर्फ ८ प्रतिशत, कुमारीले व्यक्तिगततर्फ १०.०१ र संस्थागततर्फ ८.०१ प्रतिशत र प्राइम बैंकले व्यक्तिगततर्फ १०.२५ र संस्थागततर्फ ८.२५ प्रतिशत ब्याज दिने छन् ।

सबैभन्दा बढी ब्याज एनआईएसी एशिया बैंकले घटाएको छ । कात्तिकमा बैंकले व्यक्तिगततर्फ ११.००३ र संस्थागततर्फ ९.००३ प्रतिशत ब्याज दिएको थियो । मंसिरमा व्यक्तिगततर्फ ८.९६ र संस्थागततर्फ ६.९६ प्रतिशत दिने भएको छ । यस्तै, एनएमबि बैंकले मंसिरमा व्यक्तिगततर्फ ९.७६ र संस्थागततर्फ ७.७६ प्रतिशत ब्याजदर तोकेको छ । कात्तिकमा व्यक्तिगततर्फ ११.००३ र संस्थागततर्फ ९.००३ प्रतिशत रहेको थियो ।

मंसिरमा ४ एभरेष्ट, प्रभु, सानिमा र राष्ट्रिय वाणिज्य बैंकले व्यक्तिगततर्फ ९ र संस्थागततर्फ ७ प्रतिशत ब्याज दिने भएका छन् । यी बैंकको ब्याजदर कात्तिकको तुलनामा मंसिरमा घटेको छ । कात्तिकमा व्यक्तिगततर्फ ९.२२४ र संस्थागततर्फ ७.२२४ प्रतिशत रहेको थियो ।

स्ट्याण्डर्ड चार्टर्ड बैंकको मंसिरका लागि व्यक्तिगत निक्षेपतर्फ ८.९७ र संस्थागततर्फ ५.२५ प्रतिशत, नबिल बैंकले व्यक्तिगततर्फ ९.१ र संस्थागततर्फ ७.१ प्रतिशत, कृषि विकासले व्यक्तिगततर्फ ९.५१२ र संस्थागततर्फ ७.५१२ प्रतिशत, नेपाल इन्भेष्टमेन्ट मेगाले व्यक्तिगततर्फ ९.५१ र संस्थागततर्फ ७.५१ प्रतिशत तथा ग्लोबल आइएमईले व्यक्तिगततर्फ ९.६ र संस्थागततर्फ ७.६ प्रतिशत ब्याज दिने भएको छ । हिमालयन र नेपाल एसबिआईले मंसिरका लागि व्यक्तिगत निक्षेपमा १०.६३ प्रतिशत र संस्थागततर्फ ८.६० प्रतिशत ब्याज दिने भएका छन् ।