स्मार्ट टेलिकमले पठायो प्राधिकरणलाई सम्पत्ति बिक्री वा फुकुवा गरिदिन पत्र

काठमाडौं । बक्यौता तिर्न नसकेपछि खारेज भएको निजी क्षेत्रको दूरसञ्चार सेवा प्रदायक कम्पनी स्मार्ट टेलिकमले आफ्नो सम्पत्ति बिक्री गर्न वा फुकुवा गरिदिन माग गर्दै पत्र पठाएको छ ।

स्मार्ट टेलिकमले नियामक निकाय नेपाल दूरसञ्चार प्राधिकरणलाई पत्र पठाउँदै सम्पत्ति लिलाम बिक्री नगर्ने भए फुकुवा गर्न माग गरेको हो ।

प्राधिकरणका निर्देशक एवं प्रवक्ता सन्तोष पौडेलले स्मार्ट टेलिकमले कानुनबमोजिम थप प्रक्रिया अघि बढाउन माग गर्दै पत्र पठाएको बताएका छन् ।

निर्देशक पौडेलले भने, ‘हामीले पत्र पाएका छौँ । प्राधिकरणले स्मार्ट टेलिकमको सम्पत्ति नियन्त्रणमा ल्याएपछि थप प्रक्रिया अनुरुप अघि बढ्न भनेर पत्रमा लेखेको छ ।’

स्मार्ट टेलिकमले नियामक निकाय प्राधिकरणले सम्पत्ति नियन्त्रणमा लिएपनि सञ्चालन गर्न नसकी दायित्व र जिम्मेवारीबाट विमुख भएको भन्दै आलोचना गरेको छ ।

लिलाम बिक्री नगर्ने वा गर्न असमर्थ भए प्राधिकरणले नियन्त्रणमा लिएको सम्पत्ति फुकुवा गरी प्रचलित कानुनबमोजिम सम्पत्ति र दायित्व पूरा गर्ने जिम्मेवारी कम्पनीलाई दिन माग समेत स्मार्ट टेलिकमले गरेको छ ।

कम्पनीले मंसिर २१ गते लेखेको पत्रमा १५ दिनभित्र तत्काल प्रचलित नियमावलीबमोजिम कम्पनीले प्रदान गर्ने दूरसञ्चार सेवालाई व्यवस्थापन समूहमार्फत सुचारु गर्न समेत आग्रह गरेको छ ।

नेपाल दूरसञ्चार प्राधिकरणले स्मार्ट टेलिकमको सम्पत्ति आफ्नो स्वामित्वमा ल्याएपनि सञ्चालन भने गर्न सकेको छैन । प्राधिकरणले स्मार्टको सम्पत्ति बिक्रीका लागि लिलाम प्रक्रिया पनि अघि बढाएको छैन ।