आगामी आइतबार ठमेलमा सडक महोत्सव हुदैँ , २ लाख पर्यटक भित्र्याउने लक्ष्य

काठमाडौं । ठमेल पर्यटन विकास परिषद्ले अंग्रेजी नयाँ वर्ष २०२४ को अवसरमा ‘न्यु इयर इभ ठमेल सडक महोत्सव’ गर्ने भएको छ।

परिषद्ले शुक्रबार पत्रकार सम्मेलन गरी यस बारेमा जानकारी दिएको हो ।

पत्रकार सम्मेलनमा बोल्दै ठमेल पर्यटन विकास परिषद्का अध्यक्ष भविश्वर शर्माले सबै किसिमका व्यवसायीहरुलाई मध्यनजर गरेर ठमेलको पर्यटन प्रवर्द्धनका लागि सडक महोत्सव आयोजना गरेको बताए ।

अंग्रेजी नयाँ वर्षको कार्यक्रममा आन्तरिक तथा बाह्य  गरी १ लाख ८० हाजार दर्शक ठमेल भित्र्याउने अपेक्षा आयोजकको रहेको छ । दर्शकहरूको व्यवस्थापनका लागि पनि आवश्यक तयारी गरिसकेको आयोजकले जानकारी दिएको छ ।

नयाँ वर्षको कार्यक्रम विगतका भन्दा फरक र ठूलो हुने उनले स्पष्ट पारे । ठमेललाई रातभर सञ्चालनमा ल्याउन सरकारले पहल गर्नुपर्ने शर्माले बताए । रातिको समयमा ठमेलमा सपिङ्ग गर्न सक्ने वातावरण सृजना गर्नुपर्ने उनले जानकारी गराए ।

‘न्यु इयर इभ ठमेल सडक महोत्सव’ २०८० साल पुस १५ गते आइतबार ठमेल केशरमहल सञ्चयकोष अगाडि साँझ ५ः३० बजेबाट सुरु भई रातीको १२ः३० सम्म सञ्चालन हुनेछ । कार्यक्रमको उद्घाटन उपप्रधान तथा रक्षामन्त्री पूर्णबहादुर खड्काले गर्ने आयोजकले जनाएको छ ।