आजबाट पोखरामा ‘क्यान इन्फोटेक’ शुरु

काडमाडौं,फागुन ११- नवीनतम् प्रविधिका विविध पक्षलाई प्रस्तुत गर्ने लक्ष्यका साथ पोखरामा ‘क्यान इन्फोटेक’ मेला आईतबार देखि सुरु भएको छ । कम्प्युटर एसोसिएसन नेपाल (क्यान) महासङ्‌घ कास्कीले पोखराको नयाँ बजारस्थित प्रदर्शनी केन्द्रमा आईतबारबाट सुरु गर्ने पाँचदिने मेलामा नवीनतम प्रविधिका विविध पक्षलाई एउटै थलोमा प्रस्तुत गर्न लागिएको हो।

स्मार्ट सिटीको नारा देशका विभिन्न स्थानमा अघि बढाइएको वर्तमान अवस्थामा पोखरा महानगरपालिकालाई पनि स्मार्ट सिटी बनाउने विषय राजनीतिक पार्टीका चुनावी घोषणापत्रमासमेत समेटिएको थियो।

स्मार्ट सिटीको अवधारणासँगै प्रत्येक्ष सरोकार राख्ने सूचना प्रविधिको विकास र प्रवर्द्धनका विभिन्न आयामलाई समेट्दै गर्न लागिएको क्यान इन्फोटेक मेला बहुपयोगी बन्ने क्यान कास्कीका अध्यक्ष रुक्माङ्‌गत भण्डारी (विश्वास) ले जानकारी दिए।

उनका अनुसार सूचना र प्रविधिको पहुँच सर्वसाधारणसम्म पुर्‌याउनुका साथै शिक्षित बेरोजगारलाई लक्षित आइसिटी क्षेत्रमा रोजगारी फाराम भरी हेल्पडेक्स, ग्राफिक्स डिजाइन तथा हार्डवेयर र नेटवर्कसम्बन्धी व्यावहारिक ज्ञान प्रदान गरी रोजगारीको व्यवस्था गरिनेछ।

पोखराको बजारमा अहिले पनि प्राविधिक कर्मचारीहरुको अभाव रहेको कारणले मेलामा यो अभियान अघि बढाइएको बताउँदै उनले आवेदकलाई निःशुल्क तालिम प्रदान गर्न महासङ्‌घमा आबद्ध विभिन्न १ सय ९० व्यावसायिक संस्थामा सिफारिस गरिने व्यवस्था गरिएको छ।

संस्थाले विगतमा आयोजना गरेको मेलामा फारम भरेका ५७ गृहिणी र अशक्तलाई तालिम प्रदान गरिएको बताउँदै अध्यक्ष भण्डारीले त्यसबाट व्यावहारिक ज्ञानसमेत आर्जन गरेका ४५ जनालाई रोजगारकोसमेत व्यवस्था गरिएको जानकारी दिए।

अत्याधुनिक प्रविधि प्रयोगबाट मात्र समद्ध नेपाल निर्माणमा सहयोग पुग्ने विश्वास व्यक्त गर्दै उनले त्यसका लागि कृषि, स्वास्थ्य, शिक्षालगायका विभिन्न क्षेत्रमा सूचना र प्रविधिको विकास अपरिहार्य भएकोमा जोड दिए।

गण्डकी प्रदेशस्तरीय ‘प्रभु पे क्यान इन्फोटेक-२०२० इन एसोसिएसन विथ वल्र्डलिङ्‌क’ नाम दिइएको मेला वृहत सूचना प्रविधि प्रदर्शनी, मेला अवधिभर आइसिटी कन्फ्रेन्स, प्रदेश तथा जिल्लास्तरका टाइपिङ प्रतियोगिता, आइसिटी व्यक्तित्व प्रतियोगता, विद्यालयस्तरीय हाजिरीजवाफ, आइसिटी रोजगारी फारम वितरण तथा प्रदर्शनी एवं प्रतियोगता तथा कम्प्युटर र ल्यापटकको निःशुल्क मर्मत सेवा गरिने प्रचारप्रसार संयोजक सेवक क्षितिजले जानकारी दिए।

मेलामा स्थानीयस्तरका उत्पादन एवं रोबोट प्रदर्शनी तथा प्रतियोगिता, मोबाइल गेमिङ, वैज्ञानिक आइसिटी उपकरण प्रदर्शनी र नवीनतम प्रविधिका मोबाइलको प्रदर्शनी बिक्री वितरण गरिने उनको भनाइ छ। संस्थाका संस्थापक अध्यक्ष जगनबहादुर गुरुङले मेलाले युवा तथा विद्यार्थी वर्गलाई विश्व तथा मुलुकको विज्ञान, सूचना र प्रविधिका क्षेत्रमा भए गरेका उपलब्धिका बारेमा जानकारी दिने विश्वास व्यक्त गरे।

नेपालमा विसं २०२८ मा निजी क्षेत्रको पहलमा पहिलोपटक नवीनतम प्रविधि भित्रिएसँगै मुलुक सूचना, प्रविधिको विकासमा अघि बढेको क्यान महासङ्‌घका केन्द्रीय अध्यक्ष नवराज कुँवरले जानकारी दिए।

सर्वसाधारणलाई नवीनतम सूचना प्रविधिका बारेमा जानकारी दिनुका साथै प्रयोगमा समेत सहयोग पुर्‌याउन मेला महोत्सवको महत्त्वपूर्ण भूमिका रहेको उल्लेख गर्दै उनले संस्थाले सात प्रदेशसँगै जिल्लास्थित मेलाको आयोजना गर्दै आएको बताए।

गण्डकी प्रदेशस्तरीय मेलामा सय आइसिटीसँग सम्बन्धित व्यापारिक कक्ष रहनेछन् भने ३५ लाख आम्दानी र ३० खर्च हुने बचेको पाँच लाख सूचना तथा प्रविधिको विकास एवं सामाजिक क्षेत्रमा लगानी गर्ने शनिबार यहाँ आयोजित पत्रकार सम्मेलनमा जानकारी दिइयो। रासस