२०८१ साल सुरु हुनु अघि शेयर बजार घट्यो, कारोबार पनि खुम्चियो

काठमाडौँ । वि.स २०८० सालको अन्तिम कारोबारको दिन शेयर बजार दोहोरो अकंले घटेको छ । चैत्र २९ गते भोलि बिहिवार नेपाल सरकारले इस्लाम धर्मालम्बीहरुको पर्व ईदको सार्वजनिक विदा दिएकाले २०८० सालको अन्तिम शेयर कारोवार आज नै हुने छ । लगातार दुई दिन बढेको बजारले आज भने ओरालो यात्रा तय गरेको हो ।

नेपाल स्टक एक्सचेञ्ज (नेप्से) १०.७१ अकंले घटेर २०२५.३० बिन्दुमा बन्द भएको छ । बुधबार ३०८ कम्पनीको ८६ लाख ९६ हजार ९१८ कित्ता शेयर किनबेच हुँदा ३ अर्ब ४८ करोड ५६ लाख ६० हजार ६४० रुपैयाँको कारोबार भएको छ ।

आज ११ उपसूचक राताम्य भएका छन् । बुधबार बैंकिङ समूहको ०.०३ प्रतिशत, विकास बैक समूहको १.२५ प्रतिशत, फाइनान्स समूहको २.५० प्रतिशत, होटल तथा पर्यटन समूहको १.६७ प्रतिशतले शेयर मूल्य घटेको हो ।

यसदिन, माण्डु हाइड्रोपावरको शेयर सर्वाधिक बढेको छ । कम्पनीको आज प्रतिकित्ता ९.६९ प्रतिशत अर्थात् ६८ रुपैयाँले बढेर ७७० रुपैयाँ पुगेको हो । साथै, खानिखोल हाइड्रोपावरको ८.२६ प्रतिशत,गुराँस लघुवित्तको ७.७३ प्रतिशत र पिपुल्स पावरको ६.८३ प्रतिशतले शेयर मूल्य बढेको हो ।