एनसेलले अन्त्य गर्‍याे ‘डाटाप्याक’ सकिएपछि ब्यालेन्स काटिने समस्या, ‘सधैं अन’ मा के छ ?

फाइभ–जी भिजनमा आकर्षक योजना ल्याएको दाबी

काठमाडौं । एनसेलले फाइभ–जी भिजनमा आधारित हुँदै आकर्षक योजना ल्याएको घोषणा गरेको छ ।

बुधबार होटेल म्यारियटमा पत्रकार सम्मेलन गरी एनसेलले दिएको जानकारी अनुसार यो नयाँ योजना लागू भएसँगै अब ग्राहकहरूले अनावश्यक रूपमा मोबाइलमा ब्यालेन्स काटिने समस्या झेल्नु पर्ने छैन । ‘सधैं अन’ नाम रहेको नयाँ योजनाकोे मुख्य औचित्य भनेको नेपाली ग्राहकहरूलाई आफ्नो ब्यालेन्स खतम हुने डर नगरी डाटा सधैँ अन राखेर सशक्त बनाउनु र डिजिटल भविष्यतिर डोर्याउनु रहेको बताएको छ ।

‘उपभोक्ताका आवश्यकताहरू परिवर्तन हुँदैछन् र धेरै मोबाइल फोन प्रयोगकर्ताहरूले आफ्ना दैनिक कार्यहरू जस्तै किनमेल, यात्रा, बैंकिङ कारोबार लगायतका कार्यहरू अनलाइनबाटै गर्ने भएकाले उनीहरूलाई ‘सधैं अन’ अर्थात् अनलाइन बस्न इन्टरनेट धेरै आवश्यक छ,’ एनसेलका प्रमुख कार्यकारी अधिकृत तथा प्रबन्ध निर्देशन जाब्बोर कायुमोभले भने । नेपाली ग्राहकको डेटा उपयोग गर्ने व्यवहारलाई विश्वका अन्य मुलुकहरूसरह बनाउँदै डिजिटलाइजेसनमा योगदान पुर्याउनु यो योजनाको अवधारणा रहेको उनको भनाइ छ ।

हाल चाहे त्यो एनसेल होस् वा नेपालका अरु सेवा प्रदायकका प्लानहरू हुन् इन्टरनेटमा कनेक्टेड रहँदा ग्राहकहरूको जानकारीबिना स्मार्टफोनमा रहेका विभिन्न एप्सले डेटा उपयोगबापत ब्यालेन्स कटाइदिर्ई रहेको हुन्छ । यही समस्यालाई एनसेलले तत्काल समाधान गर्न चाहेको सीईओ कायुमोभले बताए । ‘सधैं अन’मार्फत एनसेल ग्राहकहरूका ब्यालेन्स खतम हुने समस्या समाधान गर्न प्रतिवद्ध रहेको र ग्राहकहरूका सुझावहरूलाई विषेश ध्यानमा राखेर डेटा प्याकहरूलाई सरल बनाउँदै पाँच दर्जन बढी त्यस्ता डेटा प्याकहरूलाई २० वटामा झारेको एनसेलले जनाएको छ ।

वास्तवमा यो योजनाको अझ ठूलो उद्देश्य भनेको नेपाली ग्राहकहरूलाई फाइभ–जीका लागि तयार पार्नु रहेको पनि कम्पनीले स्पष्ट पारेको छ । ‘फाइभ–जी ताररहित प्रविधिको भविष्य हो र यसले व्यवसाय र अर्थतन्त्रले कसरी काम गर्छ भनेर क्रान्तिकारी परिवर्तन गर्नेछ । ६० वटा भन्दा बढी देशहरूमा यो प्रविधि पहिले नै आइसकेको छ । हामी चाहान्छौँ भारतपछि नेपाल व्यावसायिक रूपमा फाइभ–जी सञ्चालनमा ल्याउने दक्षिण एसियाको दोस्रो मुलुक बनोस् । तर त्यसका लागि हामीले एउटा महत्वपूर्ण पहिलो कदम चाल्नुपर्छ, र त्यो हो, प्रत्येक नेपालीले आफ्नो मोबाइल फोन उत्पादक रूपमा प्रयोग गर्न थाल्नुपर्छ, यसको मतलब, तपाईँको डेटा ‘सधैं अन’ हुनुपर्छ,’ सीईओ कायुमोभले भने ।

फाइभ–जीको अर्थ केवल दु्रत इन्टरनेट मात्र होइन, यसको वास्तविक अर्थ भनेको अत्याधुनिक प्रविधिको परिचय गराउने क्षमता हो जसले कृषि, स्वास्थ्य शिक्षा, पर्यटन लगायतका क्षेत्रहरूको विकासमा महत्वपूर्ण प्रभाव पार्न सक्छ । यसले नै सरकारले लिएको डिजिटल नेपालको अवधारणालाई मार्ग प्रशस्त गर्दछ । मोबाइल ब्रोडब्यान्ड स्पीडमा नेपाल अहिले विश्वको १०९औं स्थानमा छ । सन् २०२६ सम्ममा नेपाल विश्वको शीर्ष ५० मा पर्न सफल होस् भन्ने चाहना एनसेलले राखेको छ ।

नेपाली मोबाइल फोन प्रयोगकर्ताहरूको आवश्यकता र माग बढ्दै गए पनि दैनिक डेटाको उपयोग एकदमै न्यून छ । हरेक १० जनामध्ये दुई जना मात्रै नेपालीले नियमित रूपमा मोबाइल डाटा प्रयोग गरिरहेका छन् । साथै, औसत प्रतिग्राहक प्रतिमहिना डाटा खपत मात्र चार जीबी रहेको छ, जुन अन्य छिमेकी देशहरूको तुलनामा निकै कम हो ।

‘सधैं अन’ मा के छ?

एनसेलको ‘सधैं अन’ अन्तर्गत कम्पनीले बेसिक, बेस्ट र अनलिमिटेड गरी तीनवटा समूहमा आठवटा विभिन्न आकर्षक प्लानहरू सञ्चालनमा ल्याएको छ । यसमा सात दिनको समयसीमा रहेको रू. ९८ बाट सुरु हुने प्याकदेखि २८ दिन समयावधि रहेको रू. १४९९ पर्नेसम्मको विभिन्न प्लानहरू रहेका छन् ।

हरेक प्लानमा डेटा, अल नेपाल कल टक टाइम र अल नेपाल एसएमएसको बण्डलिङ्ग रहेको छ र यी प्लानहरू ग्राहकलाई विद्यमान शुल्क भन्दा दुई गुणा सस्तो शुल्कमा उपलब्ध हुन्छ । यसका साथै ‘सधैं अन’सुचारु ग्र्ने ग्राहकले सामाजिक सञ्जाल प्रयोगका लागि निःशुल्क डेटा पनि प्राप्त गर्दछन् ।

उदाहरणका लागि यदि कुनै ग्राहकले रू. ९९ को बेसिक प्लान सुचारु गरेमा ग्राहकले दुई जीबी डेटा, एक जीबी निःशुल्क सोसल मिडिया डेटा, ४९ मिनेट अल नेपाल कल टकटाइम र ४९ वटा अल नेपाल एसएमएस प्राप्त गर्नेछन् र यो ७ दिनको लागि मान्य रहनेछ । त्यस्तैगरी रू ४९९ को बेस्ट प्लान सुचारु गर्ने ग्राहकले १२ जीबी डेटा, पाँच जीबी निःशुल्क सोसल मिडिया डेटा, ४४९ मिनेट अल नेपाल कल टकटाइम र ४४९ वटा अल नेपाल एसएमएस प्राप्त गर्नेछन् र यो २८ दिनको लागि मान्य रहनेछ ।

आफ्नो आवश्यकता अनुसार धेरै डेटा तथा टकटाइम प्रयोग गर्ने ग्राहकका लागि एनसेलले ठूलो भोलुम भएको डेटा र अनलिमिटेड अल नेपाल कल टक टाइम रहेको प्लानहरू पनि ल्याएको छ । उदाहरणका लािग यस प्लान अन्तर्गत रू. १४९९ को प्याक सुचारु गर्ने ग्राहकले १०० जीबी डेटा, १५ जीबी निःशुल्क सोसल मिडिया डेटा र अनलिमिटेड अल नेपाल कल टक टाइमको सुविधा लिन पाउँछन् । यो प्याक अन्तर्गतको सेवाहरू २८ दिनको लागि मान्य रहन्छ ।

ग्राहकले एष्ट्रिक्स १२३ ह्यास डायल गरी सजिलै आफ्नो आवश्यकता अनुसार कुनै पनि ‘सधैं अन’ प्लान लिन सक्ने कम्पनीले जनाएको छ ।