थाइल्याण्डमा खत्री ‘कर्पोरेट ट्रेनर अफ द इयर’ अवार्डद्वारा सम्मानित

थाइल्याण्ड । नेपाली हस्पिटालिटी क्षेत्रका ख्यातिप्राप्त प्रशिक्षक विलास खत्रीलाई थाइल्याण्डको बैंककमा आयोजित एशिया एजुकेशन कन्क्लेभको ‘एशिया एजुकेशन अवार्ड’ अन्तर्गत ‘कर्पोरेट ट्रेनर अफ द इयर’ अवार्ड प्रदान गरिएको छ।

खत्रीले कर्पोरेट प्रशिक्षणमा उत्कृष्ट योगदान र आतिथ्य क्षेत्रमा परिवर्तनकारी प्रभावका लागि उक्त सम्मान पाएका हुन्। अवार्ड समारोह बैंककस्थित भव्य अमरी होटलमा सम्पन्न भएको थियो। खत्री, जो हाल हयात रिजेन्सी नेपालका लर्निङ एण्ड डेभलपमेन्ट म्यानेजरका रूपमा कार्यरत छन्, ३० वर्षभन्दा लामो समयदेखि हस्पिटालिटी क्षेत्रमा समर्पित रहँदै आएका छन्।

आतिथ्य क्षेत्रमा मात्रै होइन, उनले कर्पोरेट तालिम र सार्वजनिक भाषणमार्फत शिक्षा, प्रशासकीय क्षेत्र र अन्य उद्योगमा समेत गहिरो प्रभाव पार्न सफल भएका छन्। खत्रीको नेतृत्वले नेपाली र अन्तर्राष्ट्रिय स्तरका अनगिन्ती पेशेवरहरूलाई प्रोत्साहित गरेको छ।

एशिया एजुकेशन कन्क्लेभ, एक अन्तर्राष्ट्रिय मञ्च, एशिया, भारतीय उपमहाद्वीप र मध्यपूर्वका शैक्षिक नवप्रवर्तनकर्ताहरूलाई एकत्रित गर्ने उदेश्यले परिचित छ। यसले शिक्षाको क्षेत्रमा योगदान पुर्याउने व्यक्तित्वहरूलाई सम्मान गर्दै सहकार्य र प्रगतिका लागि विभिन्न सम्मेलन, पुरस्कार समारोह र नेटवर्किङ कार्यक्रमहरूको आयोजना गर्छ।

पुरस्कार प्राप्त गर्दै खत्रीले भने, “यस्तो प्रतिष्ठित मञ्चमा सम्मानित हुन पाउनु मेरो लागि गौरवको कुरा हो। यो अवार्डले मलाई अझ प्रेरित गर्दै कर्पोरेट तालिम र हस्पिटालिटी उद्योगमा मेरो योगदानलाई थप सुदृढ गर्न प्रोत्साहन दिनेछ।”

खत्रीको यो उपलब्धिले नेपाललाई अन्तर्राष्ट्रिय कर्पोरेट प्रशिक्षण र हस्पिटालिटी क्षेत्रमा उदाउँदै गरेको नेतृत्वकारी देशको रूपमा चिनाउने एउटा महत्वपूर्ण कदमको रूपमा लिइएको छ।