भारतले भन्यो– पाकिस्तानसँगको तनावले नेपालको आपूर्तिमा समस्या हुँदैन

काठमाडौं । छिमेकी देश भारतले पाकिस्तानसँगको आफ्नो तनावका कारण नेपालको आपूर्तिमा समस्या नहुने बताएको छ ।

नेपालका लागि भारतीय राजदूत नवीन श्रीवास्तवले पाकिस्तानसँगको तनावका कारण भारतबाट नेपालमा हुने आपूर्ति व्यवस्थापनमा कुनै समस्या नहुने बताएका हुन् ।

शुकुरबार लैनचौरस्थित दूतावासमा मूलधारका सञ्चार माध्यमका सम्पादकहरूसँगको कुराकानीमा राजदूत श्रीवास्तवले पेट्रोलियम पदार्थसहित कुनै पनि किसिमका वस्तुको नेपालतर्फको आपूर्ति व्यवस्था सहज हुने भएकाले ढुक्क हुन अनुरोध गरे ।

उनले सीमा क्षेत्रमा सुरक्षा व्यवस्थामा कडाइ गरिएको पनि जानकारी दिँदै विद्यमान असहज परिस्थितिलाई मध्यनजर गरी घुसपैठसहित अवाञ्छित गतिविधि हुन नदिन दुवै देशकातर्फबाट सीमा सुरक्षामा विशेष ध्यान दिनुपर्ने खाँचो औँल्याए ।

राजदूत श्रीवास्तवले हिजै प्रधानमन्त्री केपी शर्मा ओलीलाई भेटेको जानकारी दिँदै आतङ्कवादको विरोधसहित त्यसका विरुद्ध हुने कदमप्रति प्रधानमन्त्रीबाट ऐक्यबद्धता प्रकट भएको बताए ।

विश्व शान्तिको पक्षमा दृढ रहेको नेपालको कुनै पनि भूमि आतङ्कवादको विरुद्धमा प्रयोग हुन नदिने प्रतिबद्धता प्रधानमन्त्रीले व्यक्त गरेको पनि उनले जानकारी दिए ।

उनले नेपाल सरकार र यहाँका राजनीतिक पार्टीले भारतको जम्मू–कश्मीर क्षेत्रमा भएको आतङ्ककारी हमलाको विरोध गर्दै त्यसका विरुद्धमा चालिएको कदमप्रति ऐक्यबद्धता जनाएकामा नेपालाई धन्यवाद दिए । उनले जम्मू–काश्मीर क्षेत्रमा भएको आतङ्ककारी हमलाको विरुद्धमा नेपाल सरकार र समग्र नेपाली जनता उभिएकोमा खुसी व्यक्त गर्दै आतङ्कवादका विरुद्ध समग्र विश्व एक हुनुपर्नेमा जोड दिए ।

यसैगरी, यहाँका समग्र नागरिक समाज र विशेषगरी आमसञ्चार क्षेत्रबाट प्राप्त सहयोग र ऐक्यबद्धताका लागि धन्यवाद दिँदै आगामी दिनमा पनि सहयोग प्राप्त हुने विश्वास उनले व्यक्त गरे ।

कश्मीरको पहलगाममा एक नेपालीसहित २६ जना निर्दोष मानिसको ज्यान लिने गरी भएको आतङ्कवादी हमला र त्यसपछि विकासित घटनाक्रमका बारेमा जानकारी दिँदै राजदूत श्रीवास्तवले पहलगाम हमलामा पाकिस्तान जिम्मेवार रहेको बताए ।

पाकिस्तानको ‘द रेसिस्टेन्ट फोर्स (टीआरएफ)’ ले गत २२ अप्रिल मा पहलगाममा २६ जना सर्वसाधरण मानिसको ज्यान लिने गरी हमला गरेको बताउँदै उनले त्यसपछि पनि जम्मू–कश्मीर क्षेत्रका सर्वसाधरण जनतासहित धार्मिक, पुरातात्विक एवम् ऐतिहासिक महत्त्वका सम्पदालाई लक्षित गरी लगातार आक्रमण गरिहेको र जसरी हुन्छ दुई देशबीच द्वन्द्व चर्काउन खोजिरहेको भनी खेद व्यक्त गरे ।

पहलगाम हमलापछि पनि पाकिस्तानले सीमा क्षेत्रमा ड्रोन तथा मिसाइल आक्रमणलाई तीव्रता दिइरहेको, कश्मीर क्षेत्रस्थित ‘लाइन अफ कन्ट्रोल’को भारतीय सेनाका चेकपोष्ट ध्वस्त बनाएको जानकारी दिँदै राजदूत श्रीवास्तवले यस किसिमको अपूरणीय क्षतिका बावजुद् भारतको तर्फबाट संयमता अपनाइ जवाफी कारवाही मात्र गरेको स्पष्ट गरे ।

पाकिस्तान सरकारका तर्फबाट छिमेकी दुई देशबीचको द्वन्द्वलाई बढावा दिने गरी नियोजित रूपमा लगातार गलत र भ्रामक सूचना सम्प्रेषण भइरहेकामा खेद व्यक्त गर्दै राजदूत श्रीवास्तवले भने, ‘भारत द्वन्द्व चर्कियोस् भन्ने पक्षमा छैन तर देश र जनताको रक्षाको पक्षमा भने कोहीकसैसँग सम्झौता गर्ने पक्षमा छैन । यता पाकिस्तानी जनतासमेत शान्तिका पक्षमा देखिन्छन्, सम्पूर्ण विश्व समुदाय आतंकवादका विरुद्धमा उभिएको अवस्था छ, यसतर्फ पाकिस्तानी सरकार र त्यहाँका सेनाको ध्यान जान जरुरी छ ।’

पाकिस्तानी पक्षबाट भ्रम फैलाइएजस्तो सीमा क्षेत्रमा जारी द्वन्द्वमा भारतीय पक्षको क्षति नभएको पनि उनले जानकारी दिए ।

भारतका जिम्मेवार आमसञ्चारमाध्यम र निकायबाट युद्धलाई प्रश्रय दिने काम नभएको स्पष्ट गर्दै उनले जारी द्वन्द्वसम्बन्धी यथार्थ एवं वास्तविक समाचारका लागि राज्यका आधिकारिक निकायसँग भर पर्न अनुरोध गरे ।

उनले आतङ्कवाद, आतङ्कवादी हमलासहित काश्मिर क्षेत्रमा जारी द्वन्द्वबाट भारत र पाकिस्तान मात्र नभई सार्क क्षेत्रसहित समग्र विश्व नै प्रभावित हुने भएकाले आतङ्कवादका विरुद्ध डटेर सामना गर्दै विश्व शान्तिका पक्षमा अन्तर्राष्ट्रिय जगत् एक हुनुपर्नेमा जोड दिए ।

यी समाचारहरू पनि पढ्नुहोस्–