ट्रम्प र नेतान्याहूविरुद्ध इरानले जारी गर्‍यो फतवा

काठमाडौं । इजरायलसँग जारी तनावको बीचमा, इरानले अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतान्याहू विरुद्ध फतवा जारी गरेको छ ।

यस फतवामा दुवैलाई ईश्वरको शत्रु भनिएको छ र आफ्ना गल्तीहरूको लागि पश्चात्ताप गर्न भनिएको छ । फतवामा विश्वभरका सबै मुस्लिमहरूलाई उनीहरूमध्ये कुनैलाई पनि सहयोग वा समर्थन नगर्न आग्रह गरिएको छ ।

इरानका शीर्ष शिया धर्मगुरु अयातोल्लाह नासेर मकरम शिराजीले जारी गरेको फतवामा कुनै पनि व्यक्ति वा शासन जसले नेता वा मार्जा (इस्लामी वरिष्ठ विद्वान) लाई धम्की दिन्छ, उसलाई सरदार वा मोहरेब मानिन्छ । इरानी कानुनअनुसार मोहरेब त्यो व्यक्ति हो, जसले ईश्वरविरुद्ध युद्ध सुरु गर्छ र त्यस्तो व्यक्तिलाई मृत्युदण्ड, क्रूसमा टाँग्ने, अङ्ग काट्ने र देश निकालाको प्रावधान छ ।

फतवामा भनिएको छ, मुस्लिम वा इस्लामिक राज्यहरूले त्यस्ता व्यक्तिहरूलाई दिएको कुनै पनि सहयोग वा समर्थन हराम (निषिद्ध) हो । विश्वभरका सबै मुस्लिमहरूले यी शत्रुहरूलाई उनीहरूको शब्द र गल्तीहरूमा पछुताउनु आवश्यक छ । यदि कुनै मुस्लिमले आफ्नो कर्तव्य पालना गर्छ र त्यो कर्तव्य पूरा गर्न कठिनाइ वा क्षति भोग्छ भने उसलाई ईश्वरको मार्गमा योद्धाको रूपमा पुरस्कृत गरिने छ ।

इरान र इजरायलबीचको द्वन्द्व जुन १३ मा युद्ध सुरु भयो, जसमा इजरायलले अपरेशन राइजिङ लायन अन्तर्गत इरानी सैन्य र आणविक अड्डाहरूमा हवाई आक्रमण गरेको थियो । इरानले प्रतिक्रियामा अपरेशन ट्रु प्रमिस ३ सुरु गर्‍यो र इजरायलको पूर्वाधारविरुद्ध मिसाइल र ड्रोन आक्रमण गर्‍यो । त्यसपछि अमेरिका पनि दुईबीचको युद्धमा प्रवेश गर्‍यो र इरानका तीन आणविक अड्डाहरू फोर्डो, नातान्ज र इस्फहानमा आक्रमण गर्‍यो । त्यसपछि जुन २४ यता युद्धविरामको पूर्ण पालना भइरहेको छ ।