अमेरिकामा शक्तिशाली भूकम्प

काठमाडौं । अमेरिकी राज्य अलास्कामा भूकम्पको शक्तिशाली झट्का महसुस गरिएको छ । रेक्टर स्केलमा भूकम्प ७.३ को थियो ।

भूकम्पपछि राज्यको तटीय क्षेत्रहरूमा सुनामीको चेतावनी जारी गरिएको थियो । यद्यपि, केही घण्टापछि यसलाई फिर्ता लिइएको छ ।

अमेरिकी राष्ट्रिय भूकम्प विज्ञान केन्द्रका अनुसार अलास्काको पोपोफ टापुको स्यान्ड पोइन्ट नजिकै भूकम्प गएको हो । यसको केन्द्रबिन्दु जमिनबाट ३६ किलोमिटर तल थियो । यद्यपि, अहिलेसम्म कुनै हताहतको समाचार छैन ।

अलास्का भूकम्प एजेन्सीका अनुसार एक हप्तामा त्यहाँ लगभग ४०० भूकम्प रेकर्ड गरिएको बताइएको छ । मिशिगन टेक्नोलोजिकल युनिभर्सिटीका अनुसार ७ देखि ७.९ म्याग्निच्युडको भूकम्पलाई क्षति पुर्‍याउन सक्षम मानिन्छ । अलास्कामा हरेक वर्ष लगभग १०–१५ वटा यस्ता भूकम्पहरू रेकर्ड गरिन्छन् ।

अमेरिकी भूगर्भ सर्वेक्षणले स्यान्ड पोइन्टको दक्षिणमा गएको भूकम्प प्रशान्त महासागर र उत्तर अमेरिकी प्लेटहरूबीचको सबडक्शन जोनमा वा नजिकै थ्रस्ट फल्टिङका कारण भएको बताएको छ ।

अलास्का अमेरिकाको भूकम्पीय रूपमा सक्रिय राज्य हो, जहाँ विश्वको लगभग ११ प्रतिशत भूकम्प जान्छ र अमेरिकामा जाने सबै भूकम्पहरूको १७.५ प्रतिशत हुन्छ । अलास्का प्यासिफिक रिङ अफ फायरको भाग हो, जुन बारम्बार भूकम्प र सक्रिय ज्वालामुखीहरूका लागि परिचित छ।

अलास्का मार्च १९६४ मा ९.२ म्याग्निच्युडको भूकम्पको चपेटामा परेको थियो, जुन उत्तर अमेरिकामा अहिलेसम्म रेकर्ड गरिएको सबैभन्दा शक्तिशाली भूकम्प थियो । भूकम्पले एन्कोरेज सहरलाई तहसनहस पारेको थियो । पछि सुनामी आयो, जसले अलास्काको खाडी, अमेरिकी पश्चिम तट र हवाईलाई विनाश गर्‍यो ।