कोरोनाबाट अमेरिकामा १ लाख ५० हजारभन्दा धेरैको मृत्यु

काठमाण्डौ, साउन १५ – अमेरिकामा कोरोना भाइरसबाट ज्यान गुमाउनेको संख्या १ लाख ५० हजार पार भएको छ।

जोन्स हप्किन्स विश्वविद्यालयका अनुसार अमेरिकामा कोरोना संक्रमणबाट मृत्यु हुनेको संख्या १ लाख ५० हजार ४ सय ४७ छ । यसैगरी ४४ लाख १४ हजार ८ सय ३४ जनामा कोरोना संक्रमण पुष्टि भएको छ ।

कोरोनाको महामारी सुरू भएपछि अमेरिकाले कोरोनाका कारण कम्तीमा २ लाख ४० हजार अमेरिकीले ज्यान गुमाउने अनुमान गरेको थियो भने जुलाई १४ मा उसले नोभेम्बर १ सम्ममा २ लाख २४ हजार मानिसको मृत्यु हुने बताएको थियो।

अमेरिकामा पछिल्लो समय अर्थ व्यवस्थालाई लयमा फर्काउन भन्दै संक्रमणदर लकडाउन खोल्न आवश्यक आधारमा नपुगी खोल्न सुरू गरिएको थियो। पछिल्लो समय अमेरिकामा बढिरहेको संक्रमण र मृत्यु यसै कारण भएको मानिएको छ।

यस्तै अमेरिकामा मास्क प्रयोग र सामाजिक दूरी कायम गर्ने कुरामा त्यहाँका नागरिकहरूमा देखिएको अरूचिले पनि कोरोना फैलिएको छ। वर्ल्डमिटरले सार्वजनिक गरेको पछिल्लो तथ्यांकले २४ घण्टाको अवधिमा ६६ हजार बढी संक्रमित थपिएका छन् भने १४ सय बढीको मृत्यु भएको छ।

अमेरिका विश्वमा कोरोनाबाट सर्वाधिक प्रभावित मुलुक हो। त्यहाँ हालसम्म ४५ लाख बढी मानिसलाई संक्रमण भइसकेको छ।