सिटिजन्स बैंकलाई लगातार दोस्रो वर्ष ‘बैंक अफ द इयर २०२५’ अवार्ड, प्राप्त

काठमाडौं । सिटिजन्स बैंक इन्टरनेसनल लिमिटेडले विश्वकै प्रतिष्ठित ‘बैंक अफ द इयर २०२५’ अवार्ड जितेको छ ।

यो सम्मानसँगै बैंकले सन् २०२४ र २०२५ मा लगातार दुई वर्ष यो सर्वोच्च बैंकिङ पुरस्कार प्राप्त गर्ने कीर्तिमान कायम गरेको छ ।

बेलायतको प्रतिष्ठित प्रकाशन ‘द फाइनान्सियल टाइम्स’ अन्तर्गतको ‘द बैंकर’ पत्रिकाले डिसेम्बर ३ मा लन्डनमा आयोजित विशेष समारोहमा यो अवार्ड प्रदान गरेको हो।

कार्यक्रममा बैंकका संचालक समिति अध्यक्ष प्रबलजंग पाण्डे र प्रमुख कार्यकारी अधिकृत गणेशराज पोखरेलले संयुक्त रूपमा सम्मान ग्रहण गर्नुभएको थियो। समारोहमा १२५ भन्दा बढी देशका चार सयभन्दा बढी बैंकका अध्यक्ष, सीईओ तथा उच्च पदाधिकारीहरूको उपस्थिति रहेको थियो ।

अवार्ड ग्रहणपछि अध्यक्ष पाण्डेले बैंकिङ क्षेत्रको ‘अस्कर’ मानिने यो सम्मान लगातार दोस्रो वर्ष प्राप्त गर्दा अत्यन्त गौरवान्वित भएको बताउनुभयो। उहाँले यो सफलताले आगामी दिनमा अझ जिम्मेवार र ग्राहकमैत्री आधुनिक बैंकिङ सेवा प्रदान गर्न थप हौसला मिलेको धारणा राख्नुभयो ।

त्यस्तै, सीईओ पोखरेलले यो उपलब्धि सम्पूर्ण सरोकारवाला, कर्मचारीको अथक परिश्रम र ग्राहकको निरन्तर विश्वासको परिणाम भएको उल्लेख गर्नुभयो। उहाँले सुशासन, जोखिम व्यवस्थापन र हरित बैंकिङलाई प्राथमिकतामा राख्दै थप उत्कृष्ट सेवा दिने प्रतिबद्धता व्यक्त गर्नुभयो । नेपालमा सन् २००२ यता विभिन्न बैंकले यो अवार्ड जित्दै आएका छन् तर हालसम्म अस्तित्वमा रहेका नौ वटा बैंकले मात्र यो सम्मान पाएका छन्।

सिटिजन्स बैंकले लगातार दुई वर्ष जितेर नेपाली बैंकिङ क्षेत्रको गरिमा विश्वमाझ उँचो बनाएको छ । पछिल्लो समय बैंकले ग्राहकलाई डिजिटल र सुविधायुक्त सेवा दिन महत्त्वपूर्ण कदम चालेको छ ।

फोनपेसँगको सहकार्यमा नेपालमै पहिलोपटक भर्चुअल ‘सिटिजन्स फोनपे क्रेडिट कार्ड’ सञ्चालनमा ल्याएको छ भने नयाँ पुस्तालाई लक्षित ‘जेन–जी सेभिङ्स अकाउन्ट’, एकीकृत अनलाइन प्लेटफर्म ‘सिटिजन्स डिजी बैंक सेवा’ र फ्रिलान्सरका लागि विशेष बचत खाता सुरु गरेको छ।

त्यसैगरी मोबाइल बैंकिङ एपबाटै शेयर आवेदन र सी–आर–एन नम्बर लिने सुविधा तथा अन्य बैंकका ग्राहकले पनि सिटिजन्स बैंकको काउन्टरबाट क्यूआर स्क्यान गरी नगद झिक्न सक्ने क्रस बैंक टेलर सुविधा पनि सुरु गरिसकेको छ। हाल बैंकले देशभरका ६१ जिल्लामा फैलिएका दुई सय शाखा, एक सय उनान्सत्तरी एटीएम, तीन विस्तारित काउन्टर र बयालीस शाखारहित बैंकिङ इकाईमार्फत उन्नाइस लाख छपन्न हजारभन्दा बढी ग्राहकलाई आधुनिक बैंकिङ सेवा प्रदान गर्दै आएको छ ।