आइपिएल टिम राजस्थान रोयलको बिक्री कानुनी विवादमा

काठमाडौँ । भारतको लोकप्रिय क्रिकेट प्रतियोगिता आइपिएल फ्रेन्चाइजी राजस्थान रोयल्स टोलीको स्वामित्वसम्बन्धी १५ हजार ६ सय करोड भारूको ठूलो सम्झौता कानुनी विवादमा तानिन सक्ने संकेत देखिएको छ।

मिडिया रिपोर्टअनुसार उद्योगपति लक्ष्मी मित्तल, उनका छोरा आदित्य मित्तल र अदार पूनावालाले उक्त टोलीमा बहुमत हिस्सा खरिद गरेका छन् । तर यो प्रक्रिया पारदर्शी नभएको भन्दै प्रश्न उठ्न थालेपछि विवाद चुलिएको हो ।

यसअघि प्रतिस्पर्धामा रहेको सोमानी समूहले उक्त सम्झौताप्रति असन्तुष्टि जनाउँदै कानुनी कदम चाल्ने तयारी गरेको जनाएको छ । मिडिया रिपोर्टका अनुसार यस विषयमा कानुनी र जनसम्पर्क टोलीसँग छलफल भइसकेको र छिट्टै कानुनी नोटिस पठाइने तयारी भइरहेको छ । साथै, भारतीय क्रिकेट नियामक निकायलाई समेत पत्र पठाउने तयारी गरिएको जनाइएको छ ।

सोमानी समूहले सम्झौताका क्रममा धेरै महत्वपूर्ण प्रश्नको जवाफ नदिइएको दाबी गरेको छ । उनीहरूले बक्यौता भुक्तानीको अवस्था, कानुनी मुद्दाहरूको स्थिति लगायतका विषयमा स्पष्टता नआएको गुनासो गरेका छन् । आफूहरू सम्झौता टुंग्याउन तयार हुँदा पनि जानाजानी ढिलाइ गरिएको र अर्कोतर्फ गोप्य रूपमा वार्ता अघि बढाइएको आरोप लगाइएको छ ।

सम्झौताअनुसार मित्तल परिवारसँग करिब ७५ प्रतिशत स्वामित्व रहनेछ भने अदार पूनावालासँग झण्डै १८ प्रतिशत हिस्सा रहनेछ । बाँकी ७ प्रतिशत हिस्सा हालका स्वीकृत लगानीकर्तासँग रहनेछ, जसमा मनोज बादाले पनि समावेश छन् ।

नयाँ संरचनाअनुसार टोलीको सञ्चालक समितिमा लक्ष्मी मित्तल, आदित्य मित्तल, वनिशा मित्तल भाटिया, अदार पूनावाला र मनोज बादाले रहने जनाइएको छ । बादाले भविष्यमा पनि टोलीसँग आवद्ध रहनेछन् ।

सम्झौतापछि लक्ष्मी मित्तलले क्रिकेटप्रति आफ्नो लगाव रहेको र आफ्नो परिवारको सम्बन्ध राजस्थानसँग जोडिएकाले उक्त टोलीसँग जोडिन पाउँदा खुशी लागेको बताएका थिए । त्यस्तै, आदित्य मित्तलले टोलीले नयाँ प्रतिभा विकासमा खेलेको भूमिकालाई निरन्तरता दिने बताए भने अदार पूनावालाले यसलाई गौरवपूर्ण इतिहास बोकेको टोली भन्दै भविष्यको हिस्सा बन्न पाउँदा खुशी व्यक्त गरेका छन् ।