ह्याम्स हस्पिटललाई ‘कर्पोरेट हेल्थ इन्स्टिच्युशन अवार्ड’

काठमाडौं । कर्पोरेट मिडिया ग्रुपले काठमाडौंको धुम्बाराहीमा अवस्थित हस्पिटल फर एड्भान्स्ड मेडिकल एण्ड सर्जरी (ह्याम्स) लाई ‘कर्पोरेट हेल्थ इन्स्टिच्युशन अवार्ड’ प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत उनलाई सो अवार्ड प्रदान गरिएको हो । ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले अस्पताललाई सो अवार्ड प्रदान गरे ।

कार्यक्रममा अस्पतालका कार्यकारी निर्देशक आरएस भण्डारीले सो अवार्ड ग्रहण गरेका छन् ।

खासगरी कोभिड–१९ महामारीमा अग्रणी भूमिका खेलेको र चिकित्सा शिक्षामा समेत योगदान पुर्‍याएको उक्त प्रतिष्ठित स्वास्थ्य संस्थालाई स्वास्थ्य क्षेत्रमा गरेको उल्लेखनीय योगदानको कदरस्वरूप सो अवार्ड प्रदान गरिएको कर्पोरेट मिडिया ग्रुपका अध्यक्ष उज्वल जंग शाहले जानकारी दिए ।

दुई दशकभन्दा बढी समयदेखि गुणस्तरीय र सर्वसुलभ स्वास्थ्य सेवा प्रदान गर्दै आएको नेपालको अग्रणी बहुविशेषज्ञ अस्पताल ह्याम्स धुम्बाराहीमा अवस्थित छ । अस्पतालले अनुभवी नेतृत्व, दक्ष चिकित्सक र अत्याधुनिक प्रविधिमार्फत मुटुरोग उपचार, मिर्गौला प्रत्यारोपण तथा हेलिकोप्टर रेस्क्यु जस्ता विशिष्ट सेवा प्रदान गर्दै आएको छ ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–