शुक्रबार, कात्तिक ६, २०८३
कर्पोरट खबर
4:20 pm, शुक्रबार, कात्तिक ६, २०८३
काठमाडौं । नेपाली ‘यू–१९’ महिला क्रिकेट टोलीले ‘आईसीसी’ महिला ‘टी–२०’ विश्वकपको तयारीका क्रममा २ अन्तरराष्ट्रिय प्रतियोगितामा सहभागिता जनाउने भएको छ ।
नेपाल क्रिकेट संघ (क्यान)ले शुक्रबार प्रेस विज्ञप्ति जारी गरी विश्वकपको तयारीका क्रममा थाइल्याण्ड र भारतमा आयोजना हुने प्रतियोगितामा नेपाली टोली सहभागी हुने जानकारी दिएको हो ।
क्यानका सचिव पारस खड्काद्वारा जारी विज्ञप्तिअनुसार नेपालले आगामी ३ देखि ८ नोभेम्बरसम्म चीनमा आयोजना हुने ‘बेल्ट एन्ड रोड यू–१९ गल्र्स टी–२०आई’ प्रतियोगितामा प्रतिस्पर्धा गर्नेछ । प्रतियोगितामा आयोजक चीनसहित नेपाल, थाइल्याण्ड र हङकङले प्रतिस्पर्धा गर्नेछन् ।
१० देखि २२ नोभेम्बरसम्म भारतको बेङ्गलुरुमा आयोजना हुने त्रिदेशीय शृंखलामा पनि नेपाली टोलीले सहभागिता जनाउने छ ।
शृंखलामा नेपाल यू–१९ महिला टोलीका साथै भारत यू–१९ महिला ‘ए’ र भारत यू–१९ महिला ‘बी’ टोलीले प्रतिस्पर्धा गर्ने क्यानले जनाएको छ ।
