मोरङ जिल्लाभर एक साताका लागि निषेधाज्ञा जारी

काठमाडौं, वैशाख २३ – जिल्ला प्रशासन कार्यालय मोरङले जिल्लामा भर एक साताका लागि निषेधाज्ञा जारी गरेको छ । भोलि (शुक्रबार) राति १२ बजेदेखि जेठ १ गते राति १२ बजेसम्म लागु हुनेगरी निषेधाज्ञा जारी गरिएको हो । 

जिल्ला कोभिड नियन्त्रण संकट व्यवस्थापन केन्द्रको सिफारिसको आधारमा जिल्लाभर लागु हुनेगरी निषेधाज्ञा जारी गरिएको प्रमुख जिल्ला अधिकारी कोषहरि निरौलाले विज्ञप्तिमार्फत जनाएका छन् । यसअघि विराटनगर महानगरपालिका सहित केही पालिकामा निषेधाज्ञा जारी भएको थियो । प्रदेश १ को राजधानी विराटनगर कोरोना संक्रमणको दृष्टिकोणले ‘हटस्पट’ नै बनेको छ । सक्रिय संक्रमितको संख्या दुई हजार पुग्न लागेको छ । 

निषेधाज्ञामा औषधि उपचार, आफ्नै खेतबारीमा कृषिजन्य कार्य गर्ने, तोकिएको समयमा खाद्यवस्तु खरिद गर्नेजस्ता अत्यावश्यक काममा बाहेक कुनै पनि व्यक्ति घरबाहिर निस्कन र हिँड्डुल नगर्न भनिएको छ । अस्पताल, औषधालय, औषधि एवं स्वास्थ्य सामग्रीका पसल २४ सै घण्टा खुला रहने बताइएको छ ।