क्वीन्स फिल्म फेस्टिभलमा दुई नेपाली चलचित्र छनोट

काठमाडौं । न्यूयोर्कको प्रतिष्ठित क्वीन्स वर्ल्ड फिल्म फेस्टिभलमा प्रदर्शनका लागि दुई नेपाली चलचित्र छनोट गरिएको छ । जुन २६ र २७ तारिकमा चलचित्र प्रमियर हुनेछन् ।इटलीका निर्माता सर्जियो बासोद्वारा निर्देशित सरीता र अमेरिकी इयान स्कटद्वारा निर्माण, निर्देशन गरिएको चलचित्र बसन्जीलाई क्वीन्स फिल्म फेस्टिभलमा प्रिमियर गरिनेछ ।

मिथिला शर्मा, सरीता गिरी लगायतको अभिनय रहेको बसन्जी एक थ्रिलर चलचित्र हो । चलचित्र सरीतामा चाहिँ नेपालमा रहेका भुटानी शरणार्थीको कथा समेटिएको छ । यसका अधिकांश पात्रहरु भुटानी नै छन् ।

समीक्षकहरुले दुवै चलचित्रलाई राम्रो प्रतिक्रिया दिएका छन् । दुईमध्ये बसन्जीलाई अवार्डको मुख्य दावेदारको रुपमा हेरिएको छ । यी चलचित्रहरु न्यूयोर्कको क्वीन्समा अवस्थित शेर्पा किदुग हलमा प्रदर्शन गरिनेछ ।