आज देशभरका वडामा एमालेको अधिवेशन

काठमाडौँ । एमाले महाधिवेशन प्रक्रियामा होमिएको छ । एमालेले देशभरका ६ हजार सात सय ४५ वडामा शनिबार अधिवेशन गर्दैछ ।

स्थायी कमिटीको बिहीबार र शुक्रबारको बैठकले शनिबार हुने वडा अधिवेशनबाट सकेसम्म सर्वसम्मत र नभए लोकतान्त्रिक विधिबाट नेतृत्व चयन गर्न मातहतका सम्बन्धित कमिटीलाई निर्देशन दिएको छ।

एमाले अध्यक्ष केपी ओलीले भर्चुअल माध्यमबाट देशभरका सबै वडामा एकसाथ अधिवेशन उद्घाटन गर्नेछन्। वडा अधिवेशनका लागि सबै जिल्ला कमिटीका बैठकले प्रतिनिधि खटाइसकेका छन्। कात्तिक २ देखि ४ गतेसम्म बसेका जिल्ला कमिटीका बैठकले वडा अधिवेशनमा प्रतिनिधि खटाएका हुन्। ६ हजार ७ सय ४५ वडामा शनिबार हुने अधिवेशनले नयाँ नेतृत्व चयन गर्नेछ।

वडा, गाउँ र नगरमा अधिवेशन गरेर कांग्रेसले आफ्नो संगठन चलायमान बनाएसँगै एमालेले पनि अधिवेशन गर्न लागेको हो। एमालेले मंसिर १० देखि १२ गतेसम्म चितवनमा दसौं महाधिवेशन गर्ने निर्णय गरेको छ। त्यसअगाडि वडा, स्थानीय तह, जिल्ला र प्रदेशका अधिवेशन सम्पन्न गरिनेछ।

अध्यक्ष केपी शर्मा ओलीले भर्चुअल माध्यमबाट वडा अधिवेशनको औपचारिक उद्घाटन गर्नुहुनेछ’, एमाले प्रवक्ता प्रदीप ज्ञवालीले भने । वडा अधिवेशन तथा नेतृत्व चयन विधिबारेमा केन्द्रबाट सामन्य मापदण्ड पठाइएको छ। वडापछि कात्तिक ९ गते देशभरका ७५३ स्थानीय तहको अधिवेशन हुने एमालेले जनाएको छ।

एमाले केन्द्रीय कार्यालयले बढीमा ५ सयसम्म वडालाई जुममा जोडेर अध्यक्ष ओलीले एकैपटक भर्चुअल रुपमा अधिवेशन उद्घाटन तथा शुभकामना सन्देश दिनेगरी तयारी मिलाएको छ। केन्द्रीय कार्यालयमा तयार वार रुमबाट भर्चुअल उद्घाटन हुनेछ । एमाले विधानअनुसार वडा कमिटी सबैभन्दा तल्लो तहको कार्यकारी निकाय हो। त्यसभन्दा तल प्रारम्भिक कमिटीहरू रहे पनि कार्यकारी काम वडा कमिटीबाट मात्र हुन्छ।

वडा कमिटीमा अध्यक्ष, उपाध्यक्ष, सचिव, दुई उपसचिव र सदस्यहरू अधिवेशनबाट निर्वाचित हुनेछन्। कमिटीमा ३३ प्रतिशत महिला अनिवार्य गरिएको छ। वडा अधिवेशनबाट विधान अधिवेशनबाट पारित विधान कार्यान्वयमा आउने भएको छ।

चितवनमा हुने दसौं महाधिवेशनअघि एमालेले स्थानीय तहमा नेतृत्व चयन गरेर आफूलाई चुस्त दुरुस्त रहेको सन्देश दिन खोजेको छ। चितवनबाट एमालेले पाँच वर्षका लागि केन्द्रीय नेतृत्व चयन गर्नेछ। नयाँ विधानअनुसार एक अध्यक्ष एक वरिष्ठ उपाध्यक्षसहित पाँच उपाध्यक्ष, एक महासचिव, एक उपमहासचिव र सात सचिवसहित २२५ केन्द्रीय सदस्यहरूको चयन हुने आजको नागरिक दैनिकमा समाचार छ ।