शुक्रबार, कात्तिक २०, २०८३
कर्पोरट खबर
10:08 am, शुक्रबार, कात्तिक २०, २०८३
काठमाडौं । नेपाली अटोमोबाइल बजारमा आफ्नो उपस्थिति विस्तार गर्ने क्रममा बीएआईसी र आर्कफक्सले पोखराको बुद्धचोकमा नयाँ शोरुम सञ्चालनमा ल्याएका छन्।
दुवै ब्रान्डको नयाँ शोरुमको औपचारिक उद्घाटन लक्ष्मी ग्रुपका अध्यक्ष गणेशबहादुर श्रेष्ठ र कार्यकारी निर्देशक सुनील श्रेष्ठले गर्नुभएको हो। नेपालका लागि लक्ष्मी मोटरहबमार्फत प्रतिनिधित्व गरिएका यी दुई ब्रान्डले नयाँ शोरुम सञ्चालनमा ल्याएसँगै पोखरा तथा आसपासका क्षेत्रका ग्राहकलाई आफ्ना सवारीसाधन, सेवा तथा प्रविधिबारे सहज रूपमा जानकारी उपलब्ध गराउने भएका छन्।
काठमाडौं बाहिर पनि बजार विस्तार गर्दै प्रमुख क्षेत्रीय सहरहरूमा आफ्नो पहुँच बढाउने कम्पनीको रणनीतिअनुरूप पोखरामा नयाँ शोरुम सञ्चालनमा ल्याइएको हो। यसले गण्डकी प्रदेशका ग्राहकलाई अन्तर्राष्ट्रिय अटोमोबाइल ब्रान्डका सवारीसाधन नजिकबाट अवलोकन तथा छनोट गर्ने अवसर प्रदान गर्ने अपेक्षा गरिएको छ।
इन्जिनियरिङ क्षमता, उत्कृष्ट कार्यसम्पादन र बहुउपयोगिताका लागि परिचित बीएआईसीले विभिन्न प्रकारका सवारीसाधनमार्फत ग्राहकको आवश्यकता सम्बोधन गर्दै आएको छ। त्यसैगरी, विद्युतीय सवारीसाधन, आधुनिक डिजाइन र अत्याधुनिक प्रविधिमा केन्द्रित आर्कफक्सले विद्युतीय गतिशीलताको क्षेत्रमा आफ्नो पहिचान स्थापित गर्ने लक्ष्य राखेको छ।
नयाँ शोरुममार्फत ग्राहकले दुवै ब्रान्डका विभिन्न मोडल अवलोकन गर्नुका साथै तिनका विशेषता, प्रविधि, कार्यक्षमता र उपलब्ध सेवाबारे प्रत्यक्ष जानकारी लिन सक्नेछन्। एउटै स्थानबाट फरक प्रकृतिका अटोमोबाइल विकल्पबारे जानकारी पाउने भएकाले ग्राहकलाई सवारीसाधन छनोट गर्न थप सहज हुने कम्पनीको अपेक्षा छ।
पोखरामा नयाँ शोरुम सञ्चालनले गण्डकी प्रदेशमा बीएआईसी र आर्कफक्सको बजार उपस्थिति थप मजबुत बनाउनुका साथै बिक्रीपछिको सेवा तथा ग्राहकसँगको सम्बन्ध विस्तारमा समेत सहयोग पुग्ने विश्वास गरिएको छ।
नेपालमा विद्युतीय तथा आधुनिक सवारीसाधनप्रतिको आकर्षण बढ्दै गइरहेको अवस्थामा दुई ब्रान्डको नयाँ शोरुम सञ्चालनलाई क्षेत्रीय अटोमोबाइल बजार विस्तारको महत्त्वपूर्ण कदमका रूपमा हेरिएको छ।
