‘कर्पोरेट बिजनेस समिट एण्ड अवार्ड’ मा ‘फेसन ब्रेक’ (फोटो फिचर)

स्कुल अफ फेसन एण्ड इन्टेरियर डिजाइनको क्षेत्रमा महत्वपूर्ण योगदान दिँदै आएको आईआईएफटी अन्तर्राष्ट्रिय मापदण्डअनुसारको फेसन तथा इन्टेरियर डिजाइनिङ स्कुल हो

काठमाडौं । कर्पोरेट मिडिया ग्रुपले आयोजना गरेको १८औँ संस्करणको ‘कर्पोरेट बिजनेश समिट एण्ड अवार्ड, २०२६’ मा इन्टरनेशनल इन्स्टिच्युट अफ फेसन एण्ड टेक्नोलोजी (आईआईएफटी) ले विशेष प्रस्तुति दिएको छ ।

अवार्ड कार्यक्रमलाई मनोरञ्जनात्मक बनाउनका साथै कला, व्यवसाय र व्यक्तिगत विकासको प्रदर्शनका रूपमा उक्त सेग्मेन्ट समावेश गरिएको कर्पोरेट मिडिया ग्रुपकी उपाध्यक्ष सुष्मा महराले जानकारी दिइन् । विशुद्ध उद्योगी–व्यवसायीको माझमा आयोजना गरिएको अवार्ड कार्यक्रममा फेसन डिजाइनको क्षेत्रलाई पनि व्यवसायका रुपमा प्रदर्शन गरिएको उनको भनाइ छ ।

‘अवार्ड कार्यक्रमलाई ‘फेसन ब्रेक’ दिनका लागि यो कार्यक्रम निकै मेहनतपूर्वक समावेश गरेका हौँ,’ उपाध्यक्ष महराले भनिन्, ‘यसले केवल र्‍याम्पमा नयाँ कपडाहरू प्रदर्शन गर्नेमात्र नभइ नवप्रवर्तन र रचनात्मकता, आत्मविश्वास, बडी ल्याङ्ग्वेज, टीमवर्क, व्यवसाय प्रवर्द्धन तथा सांस्कृतिक विविधता र समाजको प्रतिविम्ब समेत उजागर गर्दछ ।’ फेसन शोको व्यवस्थापन र प्रदर्शनका लागि उनले आईआईएफटीका प्रबन्ध निर्देशक फुपु तेन्जिङ शेर्पालाई धन्यवाद ज्ञापन गरिन् ।

सो प्रदर्शनमा १० वटा समूहका एक/एक जना गरी १० जना मोडलहरूले प्रतिनिधिमुलक रूपमा आ–आफ्नो प्रस्तुति दिएका थिए । प्रस्तुतिमा आईआईएफटी स्कुलका फेसन समूहका विद्यार्थीहरूलाई सहभागि गराइएको आईआईएफटीका प्रबन्ध निर्देशक शेर्पाले जानकारी दिए । फेसन एण्ड इन्टेरियर डिजाइनले युवायुवतीलाई स्वरोजगारको आधार सृजना गरी स्वाबलम्वी बन्न मद्दत पुर्‍याइरहेको उनको भनाइ छ ।

उनका अनुसार स्कुल अफ फेसन एण्ड इन्टेरियर डिजाइनको क्षेत्रमा महत्वपूर्ण योगदान दिँदै आएको आईआईएफटी अन्तर्राष्ट्रिय मापदण्डअनुसारको फेसन तथा इन्टेरियर डिजाइनिङ स्कुल हो । यो नेपालकै पहिलो आईएओ ९००१:२०१५ प्रमाणित, प्राविधिक शिक्षा तथा व्यावसायिक तालिम परिषद् (सीटीईभीटी) आबद्ध तथा डब्ल्यूएससी लण्डन प्रमाणित फेसन स्कुलका रूपमा स्थापित भई सफलतापूर्वक सञ्चालन हुँदै आएको छ ।