हिमाल आरोहणका लागि ७ सय ४३ जनाले अनुमति लिँदा ५२ करोड बढी उठ्यो रोयल्टी

काठमाडौ‌ । यस वर्षको बसन्त ऋतुमा हिमाल आरोहणका लागि ७ सय भन्दा बढीले अनुमति लिएका छन् । पर्यटन विभागका अनुसार सन् २०२३ को अप्रिल १६ तारिखसम्म २३ वटा हिमाल आरोहणका लागि ७४३ जनाले अनुमति लिएका छन् ।

विभागका अनुसार अनुमित लिएकाहरुमा ८५ वटा टिम रहेको छ । जसमा ५८४ जना पुरुष र १५९ जना महिला रहेका छन् । यो सिजनका लागि ७५ देशका पर्यटकहरुले हिमाल आरोहणको अनुमति लिएका हुन् । हिमाल आरोहणको अनुमति लिएकाहरुबाट ५२ करोड ४२ लाख २० हजार ७७० रुपैयाँ बराबरको रोयल्टी संकलन भएको विभागले जनाएको छ ।

सगरमाथा हिमाल आरोहणका लागि ३ सयबढिले लिए अनुमति

विभागका अनुसार सगरमाथा हिमाल आरोहणका लागि ५६ देशका ३१९ जना पर्यटकले अनुमति लिएका छन् । जसमा ५४ महिला र २६५ पुरुष रहेका छन् । यो सिजनमा ३१ वटा टिमले सगरमाथा हिमालको आरोहण गर्ने विभागले जनाएको छ । हिमाल आरोहणको अनुमति लिएकाहरुबाट ४४ करोड २८ लाख ४७ हजार ९५६ रुपैयाँ रोयल्टी संकलन भएको छ ।