यातायात मन्त्री ज्वालाद्वारा नेपाल प्रहरीलाई इम्बोस्ड नम्बर प्लेट रिड गर्ने मेसिन हस्तान्तरण

काठमाडौँ । भौतिक पूर्वाधार तथा यातायात मन्त्री प्रकाश ज्वालाले इम्बोस्ड नम्बर प्लेट रिड गर्ने ५ थान रेडियो फ्रिक्वेन्सी आइडेन्टिफिकेसन मेसिन (आरएफआईडी) नेपाल प्रहरीलाई हस्तान्तरण गरेका छन् ।

मन्त्री ज्वालाले सो मेसिन नेपाल प्रहरी मुख्यालय अन्तरगत कार्यविभाजनका डीआईजी भरत बोहोरालाई हस्तान्तरण गरेका हुन् । हाललाई ५ थान हस्तान्तरण गरिएको यो मेसिन छिटै १ सय थान हस्तान्तरण हुने यातायात व्यवस्था विभागले जनाएको छ।

हाल सवारी साधनमा इम्बोस्ड नम्बर प्लेट जडान गर्ने व्यवस्था भए पनि यसमा उपलब्ध डेटा रिड गर्ने कुनै पनि प्रणालीको व्यवस्था थिएन। योसँगै अब भौतिक पूर्वाधार मन्त्रालयको यातायात व्यवस्था विभागले देशका विभिन्न नाकाहरूमा इम्बोर्डस प्लेट रिड गर्ने गेटको समेत निर्माण गरिरहेको छ।

सो अवसरमा भौतिक पूर्वाधार तथा यातायात मन्त्री ज्वालाले सवारी साधनमा इम्बोर्डस प्लेट जडान गरेसँगै सवारी साधनको सुरक्षा तथा अन्य हिसाबले समेत यो प्रणाली महत्त्वपूर्ण हुने बताए । कार्यक्रममा डेमो गरेर मेसिन परीक्षणसमेत गरिएको थियो ।

कार्यक्रममा भौतिक मन्त्रालयका सचिव केशव कुमार शर्मा, यातायात व्यवस्था बिभागकका महानिर्देशक उद्दब प्रसाद रिजाल तथा ट्राफिक प्रहरी प्रमुख पोषराज पोखरेको समेत उपस्थिती थियो।