संसद्मा राजेन्द्र लिङ्देनको गर्जन– कमिशन माग्न गएको पनि प्रमाण हुन्छ ?

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले जलविद्युत आयोजनाहरूको प्राथमिक शेयर (आईपीओ) निष्कासनका लागि कमिशन माग्नेहरूलाई कारबाहीको माग गरेका छन् ।

प्रतिनिधिसभाको आज शुक्रबारको बैठकमा उनले ऊर्जा उत्पादकहरूले आईपीओमा ७ प्रतिशतसम्म कमिशन माग्दै बिचौलियाहरू आफ्नो घरदैलोमा पुगेको भनिरहँदा उनीहरूलाई किन कारबाही नगरिएको भनी प्रश्न गरे ।

उनले आईपीओ निष्कासन रोकिँदा दुई वर्षदेखि ऊर्जा उत्पादकहरू पीडामा रहेको बताए ।

‘तपाईंहरू (सरकार) धितोपत्र बोर्डको शुद्धीकरण गर्ने भन्नुहुन्छ । बोर्ड दलाली गरेर बसिराखेको छ,’ सांसद लिङ्देनले भने, ‘जनताको लगानीमा विद्युतको विकास, ऊर्जाको विकास गर्ने, २८ हजार मेगावाटका कुरा गर्नुहुन्छ । दुई वर्षदेखि शेयर निष्कासन गर्न नपाएर/नभएर ऊर्जा उत्पादकहरू रोएर बस्नु परिरहेको छ । ऊर्जा उत्पादकहरूले सार्वजनिक रूपमा दलाल र बिचौलियाहरू ७ प्रतिशतसम्म कमिशन माग्दै आफ्नो घरदैलोमा आइरहेको भन्दाखेरि कारबाही हुनुपर्दैन ?’

कमिशन मागेको आरोपपछि नेपाल धितोपत्र बोर्डका पदाधिकारीले प्रमाण खोजेको प्रसङ्ग निकाल्दै उनले कमिशन माग्न गएको प्रमाण नहुने र दुई वर्षदेखि आईपीओ रोकेर राख्नु नै यसको प्रमाण भएको बताए ।

‘धितोपत्र बोर्डवालाहरू प्रमाण चाहियो, त्यस्तो प्रमाण कहाँ छ भन्छन् । कमिशन माग्न गएको प्रमाण हुन्छ ?,’ उनले प्रश्न गर्दै भने, ‘दुई वर्षदेखि शेयर निष्कासन किन र के प्रयोजनका लागि रोकेर राखियो ? त्यही हो प्रमाण ।’