सोमबार, असोज १२, २०८३
कर्पोरट खबर
11:41 am, सोमबार, असोज १२, २०८३
काठमाडौँ । राष्ट्रिय स्वतन्त्र पार्टी (रास्वपा) की सांसद रन्जु दर्शनाले पूर्वप्रधानन्यायाधीश चोलेन्द्रशमशेर जबराको पक्राउबारे कानुनी प्रक्रिया र प्रमाणको विषय उठाएकी छन् ।
दर्शनाले कसुर देखिए कानुनअनुसार पक्राउ गर्न सकिने भए पनि पक्राउको प्रक्रिया विधिसम्मत हुनुपर्ने बताएकी छन् । आरोप मात्र पर्याप्त नहुने भन्दै उनले कसुर पुष्टि गर्ने आधार र प्रमाण आवश्यक रहेको उल्लेख गरेकी छन् ।
उनले अधिकार प्रयोग गर्दा कानुन, विधि र प्रमाणलाई आधार बनाउनुपर्ने बताएकी छन् । उनले भनेकी छन्, ‘कसुर देखिए पक्राउ गर्न पाइन्छ भनेर कानुनमै व्यवस्था छ। तर पक्राउ गर्दा पनि सुर र ताल मिल्नैपर्छ। कसुर अदृश्य भए पनि कानुनले प्रमाण माग्छ। आरोप मात्र पर्याप्त हुँदैन; कसुर पुष्टि गर्ने आधार र प्रमाण पनि चाहिन्छ । कानुनको शासन भनेकै यही हो। अधिकार प्रयोग गर्न पाइन्छ, तर विधि र प्रमाणबिना होइन ।’
पूर्वप्रधानन्यायाधीश जबरालाई सुरक्षित स्थानमा केही समय स्थानान्तरण गर्न गरिएको पक्राउको सन्दर्भमा उनले उनको सुरक्षाका लागि सतर्कता बढाउनुपर्ने धारणा राखेकी छन् ।
दर्शनाले कुनै पनि पुस्ता वा समूहबाट जबरालाई सुरक्षा चुनौती आउन नदिन आवश्यक सतर्कता अपनाउनसमेत आग्रह गरेकी छन् ।
