ट्रम्पको ‘गोल्ड कार्ड’ योजना फ्लप !

काठमाडौँ । अमेरिकामा हालसम्म केवल एक जनाले मात्रै राष्ट्रपति डोनाल्ड ट्रम्पको चर्चित ‘गोल्ड कार्ड’ भिसा प्राप्त गरेका छन् । यो भिसाअन्तर्गत कुनै पनि विदेशीले १० लाख डलर तिरेर अमेरिकामा बस्न र काम गर्न पाउने अधिकार प्राप्त गर्न सक्छ ।

अमेरिकी वाणिज्य मन्त्री हावर्ड लुटनिकले संसदीय समितिको सुनुवाइमा यो जानकारी दिएका हुन् । उनले यसअघि योजना सुरु भएको केही दिनमै १ हजार ३०० आवेदन बिक्री भएको दाबी गरेका थिए, तर हालसम्म एक जनाले मात्रै भिसा पाएको खुलाएका छन् । लुटनिकका अनुसार अहिले सयौं आवेदन प्रक्रियामा रहेका छन् ।

ट्रम्पले सन् २०२५ को फेब्रुअरीमा ‘गोल्ड कार्ड’ भिसा कार्यक्रम घोषणा गरेका थिए । सुरुमा यसको शुल्क ५० लाख डलर तोकिएको थियो। पछि सेप्टेम्बरमा घटाएर १० लाख डलर बनाइएको थियो ।

ट्रम्पले यो योजना ‘अमेरिका फर्स्ट’ एजेन्डाको हिस्सा भएको बताएका थिए । उनका अनुसार भारत, चीनलगायत देशका दक्ष र प्रतिभाशाली व्यक्तिलाई अमेरिकामै रोक्न र ठूला कम्पनीलाई अमेरिका ल्याउन यो योजना ल्याइएको हो।

यो कार्डमार्फत प्राप्त हुने असीमित बसोबास अधिकारमा पासपोर्ट र मतदानको अधिकारबाहेक अमेरिकी नागरिकसरह अन्य अधिकांश सुविधा उपलब्ध हुने बताइएको छ । ट्रम्पले यो योजना विशेषगरी धनी विदेशीका लागि ल्याइएको भन्दै यसबाट उठ्ने रकम कर घटाउन र सरकारी ऋण तिर्न प्रयोग गरिने बताएका थिए । यससँगै ट्रम्पले ‘ट्रम्प गोल्ड कार्ड’, ‘ट्रम्प प्लेटिनम कार्ड’ र ‘कर्पोरेट गोल्ड कार्ड’ नामका तीन नयाँ भिसा कार्ड पनि सार्वजनिक गरेका छन् ।

वाणिज्य सचिव लुटनिकका अनुसार यो गोल्ड कार्डले हाल प्रचलनमा रहेका ईबी- १ र ईबी- २ भिसाको स्थान लिन सक्नेछ । यी दुवै भिसा अमेरिकाको स्थायी बसोबास अर्थात् ग्रीन कार्डका लागि प्रयोग हुँदै आएका छन् ।