बालमैत्री नगर कार्यान्वयनलाई दिगो बनाउनका लागि गृहकार्य

बुटवल । रुपन्देहीको तिलोत्तमा नगरपालिकामा बालमैत्री कार्यक्रमलाई दिगो बनाउने गरी गृहकार्य थालिएको छ । यसका लागि उपयुक्त योजना निर्माण थालिएको नगरपालिकाले जनाएको छ । तिलोत्तमालाई यही मंसिर २९ गते बालमैत्री नगरपालिका घोषणा गर्ने तयारी गरिएको छ ।

अहिले बालमैत्री नगर घोषणाका लागि विभिन्न कार्यक्रम भइरहेका छन् । बालमैत्री स्थानीय शासनका सूचकहरूको अन्तिम अवस्था मापन, स्थितिपत्र तयारी तथा घोषणा पश्चात् दिगोपनका लागि सरोकारवालाहरूको सहभागितामा रणनीतिक योजना निर्माण गरिएको छ । त्यसक्रममा जनप्रतिनिधि, कर्मचारी, विद्यालयका प्रधानाध्यापक, बाल क्लब, विभिन्न संघ संस्था, टोल विकास संस्था, सरकारी तथा गैरसरकारी सेवा प्रदायक निकायलगायत सरोकारवालाहरूले दिएका सुझावको आधारमा रणनीतिक योजना निर्माण गरिएको नगरपालिकाले जनाएको छ ।

योजना निर्माणका लागि नगरपालिकाले कार्यशाला गोष्ठीको समेत आयोजना गरेको छ । कार्यशालामा सबै वडाका प्रतिनिधिले आफ्नो समग्र वडाको हालसम्मको बालमैत्री वातावरणको अवस्थाको जानकारी गराउनुको साथै दिगोपनको लागि गर्नुपर्ने कामलाई समेटेर योजनासमेत प्रस्तुत गरेका थिए ।

रुपन्देहीका १६ वटा स्थानीय तहमध्ये तिलोत्तमा पहिलो बालमैत्री नगरपालिका घोषणा हुन लागेको हो । यसका लागि आवश्यक सूचक पूरा गर्न टोल टोलमा विभिन्न कार्यक्रमहरू भइरहेका छन् । बाल अधिकारको सन्दर्भमा सचेतना बढाउन छलफल, अन्तरक्रिया, र्‍याली, सडक नाटक, पर्चा टेम्पलेट तथा ब्यानर टाँस्नेलगायतका कार्यहरू भएका छन् ।

बालमैत्री नगर घोषणाका लागि ५१ वटा सूचकमध्ये ३८ वटा सूचकमा शत प्रतिशत उपलब्धि हासिल गर्नुपर्ने हुन्छ । त्यस्तै छ वटा सूचकमा ९५ प्रतिशत उपलब्धि, एउटा सूचकमा ९० प्रतिशत र छ वटा सूचकमा ८० प्रतिशत नतिजा प्राप्त गरी बालमैत्री नगर घोषणा गर्न सकिन्छ । त्यसपछि शतप्रतिशत हासिल भएका सूचकको निरन्तरता र ९५, ९० र ८० प्रतिशत नतिजा हासिल भएका सूचकलाई शत प्रतिशतमा पुर्‍याउने प्रतिविद्धतासहितको पञ्चवर्षीय रणनीतिक योजना र प्रतिबद्धता गरेमा बालमैत्री घोषणा गर्न सकिने प्रावधान रहेको छ ।