आईएमई जनरल इन्स्योरेन्सद्वारा विद्यार्थीहरुको लागि बीमालेख जारी

काठमाडौं –आईएमई जनरल इन्स्योरेन्स कम्पनीले स्कूल तहमा अध्ययन गर्ने विद्यार्थीको लागि आईजीआई बीमा लेख जारी गरेको छ ।

यो संगै अब कक्षा १ देखि १२ कक्षासम्म पढ्ने विद्यार्थीको पनि बीमा गर्न सकिने भएको छ ।

देशभर स्कूल तहमा करिव ७३ लाख विद्यार्थी रहेकोले उनीहरुलाई लक्षित गरी कम्पनीले नयाँ बीमा लेख बनाएको कम्पनीले जनाएको छ ।

यस योजनामा निधन भएको अवस्थामा विद्यार्थीलाई १ लाख र अभिभावकको ५ लाख रुपैयाँसम्म दुर्घटना बीमा भुक्तानी हुनेछ । स्थायी अंगभंग भएको विद्यार्थीले ३ लाख र अभिभावकले ५ लाख पाउने छन् ।

अंगभंग भएको अवस्थामा विद्यार्थीलाई १ लाख र अभिभावकलाई २ लाख ५० हजार भुक्तानी हुनेछ । अस्थायी रुपमा अशक्त भएको दुई महिनासम्म मासिक बढीमा १० हजारको दरले शैक्षिक शुल्क भुक्तानी हुनेछ ।

यस पोलिसी खरिद गर्ने विद्यार्थी विरामी भई उपचार गर्नु परेमा ५० हजार रुपैयाँसम्म र दुर्घटनामा परेको अवस्थामा २५ हजार रुपैयाँसम्म औषधि उपचार खर्च पनि दिने कम्पनीले जनाएको छ ।