६ विकेटले जित्याे नेपालले युएईलाई, आसिफ र मल्लले बनाए अर्धशतक

काठमाण्डौ । युएईविरुद्धको तेस्रो तथा अन्तिम एकदिवसीय अन्तर्राष्ट्रिय क्रिकेट प्रतियोगितामा नेपालले जित हासिल गरेकाे छ । नेपालले आसिफ सेख र ज्ञानेन्द्र मल्लकाे अर्धशतकीय पारीले सहज जित हासिल गरेकाे हाे ।

कीर्तिपुरस्थित त्रिवि क्रिकेट मैदानमा टस हारेर पहिले ब्याटिङको निम्तो पाएको युएईले निर्धारित ५० ओभरमा ९ विकेट गुमाएर १७६ रनको योगफल बनायो । युएईका लागि आयन अफजल खानले अविजित रहँदै ५४ रनको अर्धशतकीय पारी खेले । हजरत विलालले अविजित २० रन बनाए ।

यस्तै अलिशन शराफुले ३३ रन बनाए भने रोहन मुस्तफाले २४ तथा मुहमद वासिमले ११ रन बनाए । नेपालका गुलशन झा, दीपेन्द्र सिंह ऐरी र कुशल भुर्तेलले २/२ विकेट लिए । त्यस्तै सोमपाल कामी र ललित राजवंशीले १र१ विकेट लिए ।

नेपाल र युएईबीचको यस खेल निर्णायक खेलको रुपमा छ । तीन खेलको सिरिजअन्तर्गत नेपाल र युएईबीच १–१ को बराबरीमा रहेको छ । सिरिजको पहिलो खेलमा युएईले नेपाललाई ८४ रनले पराजित गरेको थियो भने दोस्रो खेलमा नेपालले युएईलाई ३ विकेटले हराएको थियो ।

जितका लागि १७७ रनकाे लक्ष्य पुरा गर्न मैदानमा उत्रिएकाे नेपालले ६ विकेटले जित हासिल गर्याे । नेपालले ५९ बल बाँकी हुँदै जित हासिल गरेकाे हाे ।

नेपालकाे जितमा सेख र मल्लकाे ब्याटिंग उत्कृष्ट रह्रयाे ।

११९ बलमा १२ वटा चाैका प्रहार गरेकाे सेखले ८८ रन बनाएर आउट भए । त्यसैगरी ७३ बल खेलेका मल्लले ७ चाैका र ३ छक्काकाे मद्दतले ६४ रन बनाएर पेविलियन फर्किए ।