विमान दुर्घटना: पाकिस्तान सरकारद्वारा समवेदना व्यक्त

एजेन्सी । पाकिस्तान सरकारले पोखरामा विमान दुर्घटना भएको खबरबाट मर्माहत भएको बताउँदै ज्यान गुमाएकाहरूप्रति श्रद्धाञ्जलि व्यक्त गरेको छ ।

विदेश मन्त्रालयले अपराह्न विज्ञप्ति जारी गर्दै नेपाल सरकारप्रति गहिरो दुःख व्यक्त गर्दै हार्दिक समवेदना प्रकट गरेको छ ।

“नेपालको पोखरामा भएको हवाई दुर्घटनामा भएको अमूल्य जीवनको क्षतिप्रति पाकिस्तान सरकार दुःखित भएको छ , पाकिस्तानी जनता दुःखको यो घडीमा पीडित परिवार र नेपाली जनताका साथमा छन्,” मन्त्रालयले जारी गरेको शोक विज्ञप्तिमा भनिएको छ ।

चालक दलका सदस्यसहित ७२ जना सवार यति एयरलाइन्सको विमान दुर्घटना हुँदा ६८ जनाको शव फेला परेको तथा खोज तथा उद्धार कार्य जारी रहेको नेपालका सरकारी अधिकारीहरूले बताएका छन् ।