देशमा भएका विकास र समृद्धिका सबै काम माओवादी नेतृत्वले गरेको हो : प्रधानमन्त्री प्रचण्ड

‘आगामी डेढ वर्षभित्र सिङ्गो नेपाल उज्यालो बनाउँछौँ’

काठमाडौं । प्रधानमन्त्री एवम् माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्नो दोस्रो कार्यकालमा काठमाडौं उपत्यकामा लोडसेडिङको अन्त्य भएको भन्दै तेस्रो कार्यकालमा सिङ्गो देश उज्यालो बनाउने गरी योजना बनेको बताएका छन् ।

आज शनिबार माओवादी केन्द्रको बुढानीलकण्ठको नगर सम्मेलन उद्घाटन गर्दै प्रधानमन्त्री प्रचण्ड माओवादीले आफ्नो पालामा निकै राम्रो काम गर्ने गरेको भए पनि जसचाहिँ अरुहरूले लिएको बताउँदै आगामी एक डेढ वर्षभित्र सिङ्गो नेपाल उज्यालो बनाउने बताएका हुन् ।

उनले देशमा भएका विकास र समृद्धिका सबै काम माओवादी नेतृत्वले गरेको दाबी पनि गरेका छन् । ‘देशमा विकास र समृद्धिका जति काम भएका छन्, तीमध्ये मुख्य कामहरू हाम्रै पालामा भएका छन् । मैले तीनपटक सरकारको नेतृत्व गर्दा केही रणनीतिक महत्वका काम गरेको छु । तर, हामीले आफूले गरेका कामको जस लिन सकिरहेका छैनौं । विरोधीले पीठो बेचिरहेका छन्, हामी चामल बेच्न पनि सकेनौँ,’ उनले भने ।

आफ्नो तीन वटै कार्यकालमा महत्वपूर्ण कामहरू भए पनि त्यसको स्वामित्व लिन नसकिएको उनको भनाइ थियो । ‘पहिलो कार्यकालमा गरिब किसानको एक लाखसम्मको ब्याज र तीस हजारसम्मको सावा नै मिनाहा गरियो । पूर्व–पश्चिम, उत्तर–दक्षिण परियोजनाहरू अगाडि सारियो । विकासका ठूलठूला आयोजनाहरू सञ्चालनमा आए । प्रत्येक गाविसमा सहकारी निर्माण गरियो । दोस्रो कार्यकालमा उपत्यकामा लोडसेडिङको अन्त्य गरियो । अबको डेढ वर्षमा सिङ्गो देश नै उज्यालो हुने गरी काम गर्दैछौँ,’ उनले भने ।