अमेरिकामा तीन हजार बढीको मृत्यु, चीनमा भन्दा बढी संक्रमित

काठमाडौं, चैत १८- अमेरिकामा कोरोना भाइरस (कोभिड १९) को संक्रमणबाट ज्यान गमाउनेको संख्या तीन हजार नाघेको छ । पछिल्लो २४ घण्टामा थप ५६५ जनाको मृत्यु भएसँगै अमेरिकामा कोरोना भाइरसका कारण मृत्यु हुनेको संख्या तीन हजार १ सय ४८ पुगेको छ ।

यसमध्ये न्यूयोर्कका झण्डै ८०० जना छन् । न्यूयोर्क कोरोना भाइरसका कारण सबैभन्दा बढी प्रभावित राज्य हो । जोन हप्किन्स युनिभर्सिटीको आँकडा अनुसार अमेरिकामा अहिलेसम्म एक लाख ६३ हजार भन्दा बढीमा संक्रमण पुष्टि भएको छ । यहाँ एकै दिन नयाँ संक्रमण पुष्टि हुनेको संख्या झण्डै २० हजारले थपिएको छ ।

चीनमा अहिलेसम्म कुल संक्रमितको संख्या ८१ हजार ४७० रहेको छ । अमेरिकामा यो संख्या दोब्बर भन्दा बढी पुगेको छ र संक्रमित थपिने क्रम तीव्र गतिमा छ ।

अमेरिकाका बढी प्रभावित शहरका अस्पतालहरुमा भेन्टिलेटरसहितका चिकित्सा सामग्रीको अभाव हुँदै गएको छ । यस्तै व्यक्तिगत सुरक्षात्मक सामग्री, टेस्ट किट, मास्कसहितको पनि अभाव हुन थालेको बताइएको छ ।