किसान वर्गीकरणमा महिला किसानलाई पनि समावेश गर्न माग

काठमाडौं । पछिल्लो समय कृषि कार्यमा महिलाको सहभागिता बढेकाले किसान वर्गीकरणमा उनीहरूलाई पनि समावेश गर्न माग गरिएको छ ।

नेपाल कम्युनिष्ट पार्टी एमाले निकट महिला किसान सङ्घद्वारा अन्तर्राष्ट्रिय मानवअधिकार दिवसका अवसरमा आज आयोजित महिला किसानको भूमिमा पहुँचको अवस्था, चुनौती र सम्भावना विषयक अन्तक्र्रियामा सहभागीले हलो जोतेर जीविका चलाउने महिलाको सङ्ख्या उल्लेख्य वृद्धि भएकाले किसान सूचीकरणमा उनीहरूलाई छुटाउन नहुनेमा जोड दिए ।

एमालेका पोलिटब्युरो सदस्य सुजिता शाक्यले मुलुकमा राष्ट्रिय पूँजी निर्माण गरी समाजवाद कार्यान्वयन गर्न भूमिलगायतका प्राकृतिक साधन र स्रोतमा महिलाको अधिकार सुनिश्चित गर्नुपर्नेमा जोड दिए । अहिले खेतीपातीको काममा महिलाको सहभागिता बढ्दै गएकाले किसान सूचीकरणमा सुनिश्चित गरेरमात्र न्यायपूर्ण शक्ति सम्बन्धमा परिवर्तन ल्याउन सकिने र मुलुकलाई समृद्धितर्फ लैजान सकिने विचार व्यक्त गरे ।

नेपाल कम्युनिष्ट पार्टी एमालेका केन्द्रीय सदस्य रचना खड्काले महिला किसानले कृषि कर्ममा पु¥याएको योगदानको आधारमा उनीहरूलाई प्रोत्साहन गर्नुपर्ने बताउँदै परम्परागत कार्य विभाजनलाई वैज्ञानिक रूपमा सच्चाएर महिलाको पैतृक सम्पत्तिमा हक कायम हुनुपर्ने बताए ।

महिला किसान सङ्घका अध्यक्ष सरिता भुसालले जमिनको खनजोत, बाली लगाउने, स्याहार गर्ने र बाली भित्र्याउने तथा उत्पादनदेखि भण्डारणसम्मको प्रक्रियामा महिलाको जिम्मेवारी भए पनि उनीहरू किसानको गणनामा सूचीकृत हुन नसकेको गुनासो गरे ।

कार्यक्रममा सहभागी महिला किसानले आफ्ना पहिचान स्थापित गरी सो वर्गको आर्थिक विकास तथा आत्मनिर्भरताको खाँचो औँल्याए ।