मेरियट होटलमा ‘पेरु फुड फेस्टिभल’ को आयोजना

काठमाडौं । काठमाडौंस्थित पेरुको महावाणिज्य दूतावास र नेपाललाई मान्यता प्राप्त भारतस्थित पेरुको राजदूतावासले राजधानीमा पेरु फुड फेस्टिभल आयोजना गरेको छ ।

मेरियट होटलमा आयोजना गरिएको ‘काठमाडौंमा पेरुको स्वाद’ नामक सो फेस्टिभलमा पेरुको पाक सम्पदाका बारेमा जानकारी गराइएको थियो ।

यस्तै, पेरुको सबैभन्दा प्रतिष्ठित सिर्जनाहरुमध्ये एक पिस्को साउर (कागतीको रस, सिरप, अण्डाको सेतो भाग, एङ्गोस टुरा बिटर र आइस क्यूबको मिश्रणले बनेको ककटेल) को प्रवर्द्धन गरिएको थियो । सो अवसरमा नेपालका लागि पेरुका मानार्थ महावाणिज्य दूत सुमितकुमार अग्रवालले विश्वका सबैभन्दा रुचाइएका पाक सम्पदामा पेरु समेत पर्ने बताए ।

पेरु पाककलाको लामो इतिहासलाई सम्मान गर्दै हामीले यो कार्यक्रमको आयोजना गरेका छौं’, उनले ‘भने त्यहाँका सेफहरू र जनताको जोशले दुई देशबीचको जनस्तरको सम्बन्धलाई प्रवर्द्धन गर्न ठूलो योगदान पुर्याएकोमा म विश्वस्त छु ।’

शेफ जुलियो कास्टिलोले नेतृत्व गरेको सो फुड फेस्टिभलमा उद्योगी व्यवसायी, राजनीतिक नेता तथा सञ्चारकर्मीलगाएतको उपस्थिति रहेको थियो । यस्तै, कार्यक्रममा पेरुका सांस्कृतिक भेषभुषाहरु समेत प्रदर्शनीमा राखिएको थियो ।