गोल्छा ग्रुपद्वारा प्रस्तुत ‘ग्लोकल टीन हिरो नेपाल २०२५’ को आवेदन खुला

काठमाडौं । गोल्छा ग्रुपद्वारा प्रस्तुत ‘ग्लोकल टीन हिरो नेपाल २०२५’ को ११औं संस्करणका लागि आवेदन खुला गरिएको छ । यो प्रतिष्ठित कार्यक्रमले नेपालका किशोरकिशोरीहरूलाई उनीहरूको असाधारण योगदान र नेतृत्वका लागि सम्मान गर्ने लक्ष्य राखेको छ ।

ग्लोकल टीन हिरो (जीटीएच) ग्लोकल प्रालिको एक महत्त्वपूर्ण पहल हो, जुन केवल अवार्ड वा पुरस्कार मात्र नभई परिवर्तनकारी भावना भएका युवा/किशोरकिशोरीहरूलाई उचित मूल्याङ्कन गर्दै नयाँ पुस्तामाझ पहिचान दिलाउँछ । लोकल प्रालि प्रशिक्षण, शिक्षा र सीप विकासका क्षेत्रमा कार्यरत एक अग्रणी संस्था हो । यस कार्यक्रमले किशोरकिशोरीहरूलाई उनीहरूको प्रतिभा, सिर्जनशीलता र सामाजिक कार्यहरू प्रस्तुत गर्ने अद्वितीय अवसर प्रदान गर्दछ । यसले शैक्षिक गतिविधि र व्यक्तिगत सीमारेखाभन्दा बाहिर रहेर आफ्नो समुदायमा सकारात्मक प्रभाव पार्ने सक्रिय युवाहरूलाई विशेष रूपमा चिनाउँछ ।

पृष्ठभूमि र विस्तार : ग्लोकल टीन हिरोको सुरूआत सन् २०१५ मा काठमाडौं उपत्यकाका प्रतिभावान किशोरकिशोरीहरूलाई सम्मान गर्ने उद्देश्यले भएको थियो । सन् २०१६ देखि यस कार्यक्रमलाई देशभर विस्तार गरियो, जसले गर्दा सम्पूर्ण नेपालका किशोरकिशोरीहरू यो उत्कृष्ट मञ्चबाट लाभान्वित हुन सकेका छन् । यसको पहुँचलाई दक्षिण एसियाका अन्य देशहरूमा समेत विस्तार गर्ने लक्ष्यका साथ सन् २०१९, २०२० र २०२२ मा भारत, श्रीलङ्का र बङ्गलादेशमा पनि ग्लोकल टीन हिरो प्रारम्भ गरिएको थियो । नेपालको शुद्ध धरातलबाट सुरूआत हुँदै निरन्तर विकसित हुँदै विश्वभरका उत्कृष्ट किशोरकिशोरीहरूको योगदानलाई प्रकाश पारिरहेको छ । नेपालमा नै परिकल्पना गरिएको यो कार्यक्रमको ११औं वर्षमा ग्लोकल टीन हिरोले नेपालका समर्पित, उत्साही र नवप्रवर्तनशील किशोरकिशोरीहरूलाई सशक्तीकरण र पहिचान प्रदान गर्न आवेदन आह्वान गरेको छ ।

आवेदन कसले दिने : ग्लोकल टीन हिरो नेपाल २०२५ का लागि देशभरका १३ देखि १९ वर्ष उमेर समूहका सबै उत्साही, लगनशील, दूरदर्शी र परिवर्तनकारी भावना बोकेका किशोरकिशोरीहरूले आवेदन दिन सक्नेछन् । यदि तपाईंले आफ्नो समुदाय, समाज वा कुनै विशेष क्षेत्रमा उल्लेखनीय र प्रभावकारी कार्य गरिरहनुभएको छ, शैक्षिक गतिविधिभन्दा माथि उक्लिएर आफ्नो प्रतिभा र सेवाकारी रूप प्रदर्शन गरिरहनुभएको छ, वा सकारात्मक परिवर्तन ल्याउन सक्रिय हुनुहुन्छ भने यो मञ्च तपाईंको लागि नै हो । तपाईंको पहल, प्रभाव र उपलब्धिलाई सम्मान गर्ने मञ्चका रूपमा यसको आयोजना गरिएको हो ।

आवेदन प्रक्रिया र समय सीमा : यस वर्ष ग्लोकल टीन हिरोले नेपालभरका ६० भन्दा माथिका सहरहरूमा पुग्ने र किशोरकिशोरीहरूसँग प्रत्यक्ष अन्तरक्रिया गर्ने योजना बनाएको छ । यो पूर्णत: निशुल्क कार्यक्रम हो, जहाँ नेपालका १३ देखि १९ वर्ष उमेर समूहका किशोरकिशोरीहरूले glocalteenhero.com/nepal मार्फत अनलाइन आवेदन दिन सक्नेछन् । साथै, आफ्नो समुदायका परिवर्तनशील किशोरकिशोरीहरूलाई मनोनयन गर्ने सुविधा पनि उपलब्ध छ । आवेदन आजबाट खुल्ला गरिएको छ र आवेदन पेस गर्ने अन्तिम मिति जुलाई ३०, २०२५ तोकिएको छ । दुवै सहभागिता र मनोनयन आवेदन अनलाइन उपलब्ध छन् ।

छनोट प्रक्रिया : आवेदन र कागजातको समीक्षापछि ग्लोकलको ट्वान्टी–अण्डर–ट्वान्टीको छनोट गरिनेछ । यस छनोट प्रक्रियामा सहभागीहरूको पहल, प्रभाव र उपलब्धिलाई गहन रूपमा मूल्याङ्कन गरिनेछ । तत्पश्चात्, शीर्ष ६ फाइनलिस्टहरू छनोट गरिनेछन् जसले गोल्छा ग्रुपद्वारा प्रस्तुत ग्लोकल टीन हिरो नेपाल २०२५ को अन्तिम चरणमा भाग लिने अवसर पाउनेछन् । उनीहरूको दूरदृष्टि, आचरण र कार्यको दिगोपनका आधारमा अन्तिम मूल्याङ्कन गरिनेछ ।

विशिष्ट निर्णायक मण्डल : ग्लोकल टीन हिरो नेपाल २०२५ को ग्राण्ड फिनालेमा असाधारण दिग्गज, अग्रगामी र परिवर्तनकारी व्यक्तित्वहरूको एक प्रतिष्ठित निर्णायक मण्डलले फाइनलिस्टहरूको अन्तर्वार्ता र मूल्याङ्कन गर्नेछ । यस बर्ष जूरीमा कोका–कोला नेपालकी राष्ट्रिय निर्देशक चन्द्रिका कालिया, डब्लूडब्लूएफ नेपालका राष्ट्रिय निर्देशक डा. घनश्याम गुरुङ, गोल्छा ग्रुपकी निर्देशक सीमा गोल्छा, अध्यक्ष सुरज वैद्य, वैद्यज अर्गनाइजेशन अफ इन्डष्ट्रिज एण्ड ट्रेडिङ हाउसेस र नेपालका लागि युरोपेली सङ्घका कार्यवाहक प्रमुख थोमस मिलर छन् । उनीहरूको नेतृत्व, विश्वव्यापी दृष्टिकोण र युवा सशक्तीकरणप्रतिको अटुट प्रतिबद्धताले नेपाल र विश्वका भविष्यका उज्ज्वल प्रतिभाहरूलाई पहिचान गर्न महत्त्वपूर्ण भूमिका खेल्नेछ ।

साझेदारहरू–

ग्लोकल प्राइभेट लिमिटेडले यस पहललाई सफल पार्नका लागि विभिन्न सङ्घसंस्थासँग हातेमालो गरेको छ । यो ग्लोकल प्राइभेट लिमिटेडको एक पहल हो । यस यात्राका लागि शीर्षक साझेदारको रूपमा गोल्छा ग्रुप, रणनीतिक साझेदारको रूपमा युरोपेली सङ्घ र भारतीय दूतावास काठमाडौं छन् । यसका साथै, शैक्षिक साझेदारको रूपमा एम्बार्क कलेज छ । प्रमुख साझेदारको रूपमा होण्डा, कोका–कोला, डब्लूडब्लूएफ, पञ्चकन्या समूह, केएफसी, टोयोटा र रियल सूचीकृत छन् ।

बैंकिङ साझेदारका रूपमा: ग्लोबल आईएमई बैंक, नबिल बैंक र नेपाल एसबीआई बैंक लिमिटेड तथा नेपाल पर्यटन बोड प्रवर्द्धक साझेदार बनेको छ भने द सोल्टी काठमाडौं आतिथ्य सेवा प्रदायक साझेदार, वर्ल्डलिंक इन्टरनेट साझेदार, द काठमान्डू पोष्ट र कान्तिपुर एप मिडिया साझेदारको रूपमा छन् । हिमालय टीभी एचडी प्रत्यक्ष प्रसारण साझेदार, यती एअरलाइन्स एअरलाइन्स साझेदार, प्रिज्मा एडभर्टाइजिङ पीआर साझेदार, एनएनक्यू सूचना प्रवाह साझेदार तथा पिज्जा हट र बेगानी ग्रुप समर्थकको रूपमा उल्लेखित गरिएका छन् । साझेदारहरूको यो विस्तृत सञ्जालले एक साझा दृष्टिकोण र ग्लोकलको नवीनतम पहलको सफलता र प्रभावप्रति प्रतिबद्धता झल्काउँछ ।