एप्पलद्वारा प्रसिद्ध टेक युट्युबर जोन प्रोसर र माइकल रामासियोटीविरुद्ध मुद्दा दायर

काठमाडौं । एप्पलले प्रसिद्ध टेक युट्युबर जोन प्रोसर र माइकल रामासियोटीविरुद्ध मुद्दा हालेको छ ।

कम्पनीले युट्युबर प्रोसर र रामासियोटीले यस वर्ष कम्पनीले सुरु गर्ने आइओएस-२६ को बारेमा गोप्य जानकारी अनलाइन लीक गरेको आरोपमा मुद्धा दायर गरको हो । युट्युबरले यो जानकारी एप्पलका एक कर्मचारी मार्फत प्राप्त गरेका थिए, जसलाई कम्पनीले बर्खास्त गरेको थियो ।

एप्पलले क्यालिफोर्नियाको संघीय अदालतमा प्रसिद्ध टेक युट्युबर जोन प्रोसर र माइकल रामासियोटी विरुद्ध मुद्दा दायर गरेको छ । कम्पनीले उनीहरूलाई आगामी आईफोन सफ्टवेयर अपडेट आइओएस २६ सँग सम्बन्धित व्यापारिक गोप्य कुराहरू चोरी गरेको आरोप लगाएको छ ।

रोयटर्सको रिपोर्ट अनुसार, एप्पलले आधिकारिक रिलीज हुनुभन्दा पहिले गोप्य जानकारी अनलाइन लीक भएको दाबी गरेको छ । बिहीबार दायर गरिएको मुद्दामा माइकल रामासियोटीले एप्पलका एक कर्मचारीलाई जारी गरिएको फोन प्रयोग गरेर आइओएस २६ सँग सम्बन्धित जानकारी प्राप्त गरेको उल्लेख छ । उनले यो जानकारी जोन प्रोसरलाई दिएको आरोप छ, जसले त्यसपछि आफ्नो लोकप्रिय युट्युब च्यानल ‘फ्रन्ट पेज टेक’ मा एक भिडियोमा साझा गरेका थिए ।

रोयटर्ससँग कुरा गर्दै, जोन प्रोसरले जानाजानी कुनै पनि गलत काम गरेको अस्वीकार गरे । उनले भनेका छन् ‘मैले निश्चित रूपमा जानकारी चोर्ने षड्यन्त्र गरेको थिइनँ न त मलाई थाहा थियो कि यो जानकारी मूल रूपमा कसरी प्राप्त भयो ।’ उनले अदालतमा आफ्नो पक्ष राख्ने बताएका छन् ।

जोन प्रोसर टेक जगतमा एक प्रसिद्ध व्यक्ति हुन् । उनी युट्युबमा ‘फ्रन्ट पेज टेकु नामक आफ्नो च्यानल चलाउँछन् । उनी नियमित रूपमा एप्पलका अप्रकाशित उत्पादनहरू र सफ्टवेयरको बारेमा लीक र जानकारी साझा गर्छन् । जनवरीमा, जोन प्रोसर आईओएस २६ को बारेमा जानकारी साझा गर्ने पहिलो व्यक्ति थिए, जुन एप्पलले यस वर्ष लन्च गर्ने बताइएको छ ।