अटो व्यवसायीहरूको महत्वपूर्ण ‘चाड’ नाडा आटो शो सुरू, प्रधानमन्त्रीले गरे उद्घाटन (तस्बिरहरू)

पहिलो पटक नेपालमा ह्युमनाइड रोबोट र फ्लाइङ कार सार्वजनिक गर्न सफल भयौँ : अध्यक्ष चौधरी

काठमाडौं । अटो व्यवसायीहरूको महत्वपूर्ण ‘चाड’ नाडा आटो शो काठमाडौंको भृकुटीमण्डपमा सुरू भएको छ ।

नाडा अटोमोबाइल्स एसोसिएशन अफ नाडाको आयोजनामा आजदेखि सुरू भएको १७औँ संस्करणको नाडा अटो शो आज मंगलबार प्रधानमन्त्री केपी शर्मा ओलीले उद्घाटन गरेका छन् । सो अवसरमा उनले नेपालमै पहिलो पटक ल्याइएको उड्ने कार ‘फ्लाइङ ट्याक्सी’ पनि सार्वजनिक गरेका छन् ।

उद्घाटन समारोहलाई सम्बोधन गर्दै उनले नेपालमा लगानी र काम गर्न कुनै बाधा नरहेको बताए । वैज्ञानिक खोज, अध्ययनसँगै नयाँ नयाँ विकास, आविष्कार र प्रगति भएको बताउँदै नेपालले पनि त्यस प्रकारको विकासको सहज उपभोग गर्ने स्थिति बनाउनुपर्नेमा जोड दिए ।

नयाँ ढंगले काम गर्ने युवाहरूलाई सरकारले सबै खालको साथ दिने विश्वास व्यक्त गर्दै प्रधानमन्त्री ओलीले नेपाली नागरिकहरू असन्तुष्ट हुनुपर्ने कुनै कारण नरहेको दाबी गरे ।

‘हामीले अग्रगमन र आधुनिकीकरणका लागि नीतिगत व्यवस्थाहरु र पूर्वाधार विकास गरेका छौँ । लगानी र काम गर्न कुनै बाधा छैन । अहिले असन्तुष्ट हुनुपर्ने कुनै कारण छैन । कोही असन्तुष्ट नै हुन्छु भनेर कसम खाएको छ भने त केही लाग्दैन,’ उनले भने, ‘उत्तर र दक्षिणतिर नयाँ र पक्की मार्गहरु बन्दैछन्, अन्तर्राष्ट्रिय विमानस्थल थपेका छौँ । हरित उर्जा, मिथेन ग्यास, धौवादी फलामको उत्पादन गरेर प्रयोग गर्दैछौं । प्रविधिको रुपान्तरण भैसकेको छ । यी सबैको ध्येय विकास र समृद्धि हो । यसमा तपाईंहरु ढुक्कले अगाडि बढ्नुस् । देशका लागि योगदान दिनुहोस् ।’

यस्तै उनले सरकारले पूर्वाधार बनाउनुपर्ने भन्दै हुलाकी राजमार्ग डबल लेनमा विकास गरिररहेको चर्चा गरे ।

कार्यक्रममा नाडाका अध्यक्ष करण चौधरीले नीतिगत व्यवस्थादेखि व्यवसायीको मनोबल बढाउन समेत काम गर्दै आएको बताए । ‘युवा शक्ति पलायन हुन रोक्न नाडाले सीप दिने र रोजगारी पनि दिन्छ, त्यसका लागि श्रम मन्त्रालयसँग सम्झौता भइसकेको छ,’ उनले भने, ‘पहिलो पटक नेपालमा ह्युमनाइड रोबोट र फ्लाइङ कार सार्वजनिक गरेका छौं । यसले नेपालमा एअर मोबिलिटीको बहस सृजना गर्दै त्यससँग सम्बन्धित नीति निर्माणमा सहजता ल्याउने विश्वास हामीले गरेका छौँ ।’