डेल्सी रोड्रिगेजले लिइन् भेनेजुएलाको अन्तरिम राष्ट्रपतिको रूपमा शपथ

काठमाडौँ । अमेरिकाद्वारा बन्धक बनाइएका भेनेजुएलाका अपदस्थ राष्ट्रपति निकोलस मादुरोकी पूर्व उपराष्ट्रपति डेल्सी रोड्रिगेजले भेनेजुएला संसद भवनमा अन्तरिम राष्ट्रपतिको रूपमा शपथ ग्रहण गरेकी छन् ।

डेल्सी रोड्रिगेजलाई उनका भाइ, राष्ट्रिय सभाका नेता जर्ज रोड्रिगेजले शपथ ग्रहण गराएका थिए । शपथ ग्रहणको क्रममा उनले भनिन्, ‘मेरो देशमा अवैध सैन्य आक्रमणपछि भेनेजुएलाका जनताले भोगेको अत्याचारप्रति म शोक गर्छु । दुई नायकहरूको अपहरणमा पनि म शोक गर्छु ।’

उनले यो जिम्मेवारी भारी मनले लिइरहेको बताउदै अमेरिकी कारबाहीलाई राष्ट्रपति निकोलस मादुरो र प्रथम महिला सिलिया फ्लोरेसको अपहरणको रूपमा वर्णन गरेकी थिइन् । रोड्रिगेजले संवैधानिक राष्ट्रपति मादुरोको तर्फबाट कार्यवाहक राष्ट्रपतिको रूपमा शपथ ग्रहण गरेकी हुन् ।

शपथ ग्रहण पछि तुरुन्तै, भेनेजुएलाका नजिकका सहयोगी देशका कूटनीतिज्ञहरूले उनलाई बधाई दिएका थिए ।

यसैबीच, मादुरो समर्थकहरू राजधानी कराकासमा सडकमा उत्रिएका छन् । सयौं मानिसहरूले मादुरोको समर्थनमा भेनेजुएलाको झण्डा र प्लेकार्ड बोकेर प्रदर्शन गरे। भेनेजुएला सरकारले आफ्ना निर्णयहरूको समर्थनमा बारम्बार यस्ता प्रदर्शनहरू आयोजना गरेको छ। यसअघि, विपक्षी विरोधको प्रतिक्रियामा सरकार समर्थक जुलुसहरू आयोजना गरिएका छन्, जसले राजधानीका सडकहरूमा तनावपूर्ण वातावरण सिर्जना गरेको छ।

यसअघि मादुरो र उनकी श्रीमतीलाई अमेरिकाले पक्राउ गरेपछि भेनेजुएलाको सर्वोच्च अदालत र सेनाले डेल्सी रोड्रिगेजलाई कार्यवाहक राष्ट्रपतिको रूपमा मान्यता दिएको थियो । डेल्सी रोड्रिगेज वामपन्थी नेता तथा पूर्व छापामार जर्ज एन्टोनियो रोड्रिगेजकी छोरी हुन्, जसले १९७० को दशकमा क्रान्तिकारी संगठन लिगा सोसियालिस्टा स्थापना गरेका थिए । डेल्सी रोड्रिगेजलाई निकोलस मादुरोको सबैभन्दा विश्वासिला नेताहरू मध्ये एक मानिन्छ ।