गगन-विश्वको नयाँ काँग्रेस: बिना गठबन्धन चुनावमा होमियो

काठमाडौँ । चुनावको मुखैमा बिभाजनको संघारमा पुगेको नेपाली काँग्रेस फागुन २१ गतेको प्रतिनिधि सभाको चुनावको मनोनयन दर्ता सकिदा सम्हालिएर राम्रो अवस्थामा पुगेको देखिएको छ । तत्कालका लागि काँग्रेसको किचलो साम्य भएको छ ।

विशेष महाधिवेशनबाट आएको गगन थापा नेतृत्वको कार्यसमितिले आफ्नो काम पनि देखाएको छ । तत्कालिन सभापति शेरबहादुर देउवा दम्पतिलाई टिकट नदिने देखि पूर्णबहादुर खड्का, प्रकाशमान सिंह, डा. शशांक कोइराला, धनराज गुरुङ, रमेश लेखक, बालकृष्ण खाँण चुनाव लडेनन् या पार्टीले टिकट दिएन, दुवै भन्न सकिन्छ ।

पूर्वकार्यवाहक सभापति पूर्णबहादुर खड्काले नैतिकताका आधारमा चुनाव नलड्ने घोषणा गरेर आफलाई नैतिकवान देखाउने प्रयास गरे पनि आफ्नो क्षेत्रमा भाईलाई उम्मेदवार बनाएका छन् । त्यस्तै देउवाले आफुले टिकट नपाएपछि उनकै चाहनामा डडेल्धुरामा नेविसंघका पूर्व अध्यक्ष नैनसिंह महरलाई उम्मेदवार बनाइएको छ । यस्तै कारण जे सुकै होस् उनीहरु चुनावमा उम्मेदवार छैनन् ।

गगन नेतृत्वको समितिको पहिलो सफल यो मान्न सकिन्छ । अर्को उम्मेदवार छनौटमा काँग्रेसले नयाँ, युवा, अनुभवीको मिश्रण देखाएको छ । यसको निर्वाचनमा कति फाइदा हुन्छ, त्यो त पछि नै थाहा होला तर तत्कालका लागि काँग्रेसले उम्मेदवार छनौटमा सुझबुझ देखाएको भन्न सकिन्छ । यद्यपी गगन नेतृत्वको टिमले छानेका उम्मेदवार विवाद रहित भने छैनन् । गगन निकट धेरैले टिकट पाएको काँग्रेस वृतमा अहिले निकै चर्चा छ ।

विशेष महाधिवेशनमा खटेर लागेका र गगनलाई समर्थन गरेका मनोजमणि आचार्य र प्रतिमा गौतम जस्ता नेताहरुलाई नजरअन्दाज गरेको आरोप लागेको छ । तर काँग्रेसले यसअघि वितरण गर्ने भन्दा धेरै हदसम्म सन्तुलित र नयाँ अनुहारलाई मैदानमा उतारेर नयाँ सन्देश दिन खोजेको देखिन्छ ।

यस पटक देउवाले टिकट नदिएका मिनेन्द्र रिजाललाई टिकट दिइयो भने विवादित र आमरुपमा आलोचितलाई टिकट नदिएर काँग्रेस परिवर्तन भएको संकेत दिने प्रयास भएको छ । यस पटकको अर्को राम्रो पक्ष भनेको काँग्रेसका नेता कार्यकर्ताले देशका सबै निर्वाचन क्षेत्रमा रुखमा मत हाल्न पाउनु हो । गठबन्धन नगर्ने निर्णय गरेपछि काँग्रेसमा एक किसिमको सकारात्मक रक्त सञ्चार भएको छ र यसको प्रभाव अन्य दलमा पनि परेको छ । यस पटक धेरै पछि बिना गठबन्धन दलहरु चुनावमा गएका छन्, जसको श्रेय गगन थापा र विश्वप्रकाश शर्मालाई जान्छ ।