शनिबार, असार १३, २०८३
कर्पोरट खबर
11:43 am, शनिबार, असार १३, २०८३
काठमाडौं । ग्लोबल आइएमई बैंक लिमिटेडले देशमा उद्यमशीलताको विकास गर्ने तथा साना र मझौला उद्योगहरूलाई सहयोग गर्ने उद्देश्यले ‘ग्लोबल आइएमई उद्यमशाला’ कार्यक्रमको घोषणा गरेको छ।
‘विश्व लघु, साना तथा मझौला व्यवसाय दिवस २०२६’ को अवसरमा बैंकले यो नयाँ योजना ल्याउँदै देशभरका इच्छुक उद्यमी र नयाँ सोच भएका व्यक्तिहरूबाट आवेदन आह्वान गरेको हो।
कार्यक्रमको मुख्य उद्देश्य नयाँ र रचनात्मक व्यावसायिक सोच भएका व्यक्तिहरूलाई सफल उद्यमी बन्न प्रेरित गर्नु रहेको बैंकले जनाएको छ । साथै, हाल सञ्चालनमा रहेका साना व्यवसायहरूलाई दिगो र प्रतिष्ठित बनाउन आवश्यक पर्ने सैद्धान्तिक तथा व्यावहारिक ज्ञान, सीप र परामर्श प्रदान गर्नु पनि यसको लक्ष्य रहेको छ।
बैंकको प्रधान कार्यालय कमलादीमा आयोजित एक विशेष समारोहमा बैंकका प्रमुख कार्यकारी अधिकृत सुरेन्द्र राज रेग्मीले कार्यक्रमको विधिवत् शुरू गर्दै आवेदन खुल्ला भएको जानकारी दिएका हुन् ।
कार्यक्रममा बोल्दै सीईओ रेग्मीले भने, ’लघु, साना तथा मझौला व्यवसायीहरूले भोग्नुपर्ने साझा चुनौतीहरूलाई समाधान गर्न बैंकले यो प्लेटफर्म तयार गरेको हो। सम्बन्धित क्षेत्रका विज्ञ, अनुभवी व्यवसायी तथा प्रशिक्षकहरूमार्फत सहभागीहरूलाई व्यावहारिक ज्ञान र समस्या समाधानका उपायहरू सिकाइनेछ।’
व्यवसायीहरूको आवश्यकता र अवस्थालाई हेरेर बैंकले यस कार्यक्रमलाई दुई भागमा विभाजन गरेको छ । यो नयाँ र सिर्जनशील व्यावसायिक सोच भएका तर काम कसरी शुरू गर्ने भन्ने अलमलमा रहेका युवाहरूका लागि लक्षित रहेको बैंकले जनाएको छ । यसअन्तर्गत उनीहरूको क्षमता बढाउन, व्यावसायिक सञ्जाल विस्तार गर्न र सही मार्गनिर्देशन दिन मद्दत गरिनेछ ।
यो हाल सञ्चालनमा रहेका तर आफ्नो व्यवसायलाई अझ ठूलो र व्यवस्थित बनाउन कठिनाइ भोगिरहेका उद्यमीहरूका लागि हो । यसअन्तर्गत आधुनिक प्रविधिको प्रयोग, बजारीकरण र सरोकारवाला निकायहरूसँग पहुँच पुर्याउन सहजीकरण गरिनेछ ।
कार्यक्रममा सहभागी हुनेहरूले व्यवसाय दर्ता, कर तथा कानुनी प्रक्रिया, बजार अध्ययन, उत्पादन प्रक्रिया, वित्तीय व्यवस्थापन र बैंकहरूसँगको पहुँच जस्ता महत्त्वपूर्ण विषयमा उपयोगी व्यावहारिक ज्ञान पाउने बैंकले विश्वास लिएको छ। उक्त उद्घाटन समारोहमा बैंकका नायव प्रमुख कार्यकारी अधिकृत, उच्च व्यवस्थापकहरू र साझेदार संस्थाका प्रतिनिधिहरूको उपस्थिति रहेको थियो।
ग्लोबल आइएमई बैंक विभिन्न राष्ट्रिय तथा अन्तर्राष्ट्रिय प्रतिष्ठित पुरस्कारहरूबाट सम्मानित भइसकेको छ । बैंकले ’बैंक अफ द इयर २०१४’, ’बेष्ट इन्टरनेट बैंक २०१६’ का साथै सन् २०२४, २०२५ र २०२६ मा लगातार ’बेष्ट बैंक नेपाल’ को अवार्ड जितेको छ। यसबाहेक युरोमनी अवार्ड र बेष्ट इम्प्लोयर जस्ता प्रतिष्ठित सम्मान पनि बैंकले प्राप्त गरिसकेको छ।
नेपालको ७७ वटै जिल्लामा शाखा सञ्जाल पुर्याउने ग्लोबल आइएमई बैंक निजी क्षेत्रको पहिलो वाणिज्य बैंक हो । हाल बैंकले ३४४ शाखा, ३६८ एटिएम, १४७ शाखारहित बैंकिङ सेवा, ६९ एक्सटेन्सन तथा राजश्व संकलन काउन्टर र ३ वटा वैदेशिक प्रतिनिधि कार्यालयसहित १,००० भन्दा बढी सेवा केन्द्रबाट ग्राहकहरूलाई उत्कृष्ट सेवा दिँदै आएको छ।
नेपाल भित्र मात्र नभई बैंकले अमेरिका, बेलायत, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, युएई लगायतका विभिन्न देशहरूबाट सुरक्षित रूपमा रेमिट्यान्स (विप्रेषण) भित्र्याउने कार्यमा पनि महत्त्वपूर्ण योगदान पुर्याउँदै आएको छ।
