टोटनह्यामलाई हराएको लिभरपुल शीर्षको दौडमा बलियो

काठमाडौं,माघ १६- इङलिस प्रिमियर लिग अन्तर्गत गएराति भएको खेलमा साविक विजेता लिभरपुलले अर्काे बलियो टोली टोटनह्याममाथि जित हात पारेको छ । निकै प्रतिस्पर्धात्मक खेलमा  टोटनह्यामलाई ३–१ ले हराउँदै लिभरपुलले शीर्ष स्थानको दौडमा आफूलाई कायम राखेको छ । 

 टोटनह्यामको घरेलु मैदानमा भएको खेलमा लिभरपुलले पहिलो हाफको इन्जुरी समयमा गोल गरी खेलमा अग्रता बनाएको थियो । इन्जुरी समयको चौथो मिनेटमा रोबेर्टो फिर्मिनोले गोल गरेका थिए ।

दोस्रो हाफ सुरु हुनेबित्तिकै ४७औँ मिनेटमा लिभरपुलका लागि ट्रेन्ड आर्नोल्डले दोस्रो गोल गरे। 

टोटनह्यामका लागि ४९औं मिनेटमा पाइरे एमाइलले गोल गरेर टोलीलाई खेलमा फर्काउने प्रयास गरेका थिए । ६५ मिनेटमा लिभरपुलका लागि साडियो मानेले तेस्रो गोल गर्दा लिभरपुल सहज जित निकाल्न सफल भयो। 

जितपछि २० खेलबाट ३७ अंक जोडेको लिभरपुल चौथो स्थानमा उक्लिएको छ । पराजित भएको टोटनह्याम १९ खेलबाट ३३ अंकका साथ छटौँ स्थानमा छ । 

१९ खेलमाट ४१ अंक रहेको म्यान्चेस्टर सिटी शीर्ष स्थानमा रहँदा २० खेल खेलेका म्यान्चेस्टर युनायटेड ४० अंकसहित दोस्रो र ३९ अंक रहेको लेस्टर सिटी ३९ अंकसहित तेस्रो स्थानमा छन् ।