सिभिल बैंकद्वारा कोभिड–१९ प्रभावित विपन्न समुदायका लागि मानवीय सहयोग कार्यक्रममा हस्ताक्षर

काठमाडौं । सिभिल बैंकले कोभिड–१९ प्रभावित विपन्न समुदायका लागि मानवीय सहयोग कार्यक्रमका लागि तीन वटा संस्थासँग सम्झौता गरेको छ । बैंकले सरोकारवाला संस्थाहरू हेल्भेटास नेपाल, क्षिरेश्वरनाथ नगरपालिका र सामुदायिक विकास तथा पैरवी मञ्च नेपालसँग सम्झौता गरेको हो ।

आज आइतबार एक कार्यक्रमबीच बैंक र ती संस्थाहरूबीच सम्झौतापत्रमा हस्ताक्षर भएको बैंकले बताएको छ । कोभिड–१९ को पहिलो लहरले स्वास्थ्य तथा आर्थिक रुपमा कठिनाई भोगिरहेका डोम, चमार र मुसहर जस्ता विपन्न समुदाय पुनर्स्थापित र तङ्ग्रीन लागि रहेको अवस्थामा पुनः दोश्रो लहरले थप कष्टकर बनाएकाले उनीहरूको सहजताका लागि बैंकले यस्तो सम्झौता गरेको बताइएको छ ।

त्यसले पारेको प्रभावलाई न्यूनीकरण गर्ने अभिप्रायबाट हेल्भेटास नेपाल र स्वीस सोलिडारिटीले कोभिडबाट प्रभावित क्षिरेस्वरनाथ नगरपालिकाका अति विपन्न समुदाय (मुसहर, चमार र डोम)का आधारभूत आवश्यकतालाई सम्बोधन गर्नका लागि र तिनै विपन्न घरपरिवारको जीविकोपार्जनमा तत्काल टेवा पुर्याउने उद्देश्यले क्षिरेश्वरनाथ नगरपालिकामा छनौट भएका १२५० घरधुरीलाई जिविकोपार्जनमा तत्कालका समस्या सम्बोधन गर्नका लागि अनुदान सहयोग प्रतिघरधुरी २० हजार रुपैयाँका दरले भुक्तानी गर्ने कार्यमा संलग्न रहने छ ।

सिभिल बैंकले छनौट भएका लाभान्वित परिवारहरु खास गरी महिला सदस्यहरुको लागि वहाँहरुको घरदैलो मै गई सहज रुपमा व्यक्तिगत बैंक खाता खोल्न सहयोग गरी नगद रकम हस्तान्तरण गर्ने व्यवस्था मिलाउने छ । साथै बैंकले उक्त समुदायमा बैंकिङ प्रणाली तथा वित्तीय साक्षरता सम्वन्धित अभियान पनि सञ्चालन गरिने बताएको छ ।