आज गुरु पुर्णिमा, गुरुप्रति सम्मान जनाएर मनाइँदै

काठमाडौं । आज असार ९ गते (शनिबार) आषाढ शुक्ल पूर्णिमाका दिन गुरु पूर्णिमा पर्व मनाइँदैछ । गायत्री, दीक्षा, वेद मन्त्र सुनाउने र शिक्षा दिने गुरुजनप्रति सम्मान स्वरुप यो पर्व मनाइदै आएको छ ।

‘गु’को अर्थ अन्धकार र ‘रु’ भन्नाले प्रकाश बुझिन्छ । ज्ञानरुपी प्रकाशले अज्ञानरुपी अन्धकारको नाश गराउनेलाई गुरु भन्ने विभिन्न शास्त्रमा उल्लेख छ । सामान्यतया अन्धकारको नाश जीवनमा उज्यालो फैल्याउने व्यक्तिलाई गुरु भनिने गरिन्छ ।

गुरुलाई ब्रह्मा, विष्णु र महेश्वरका रुपसमेतमा मानिने गरेको छ । फलस्वरुप आज यो मन्त्रोच्चारण गरिने गरिन्छ ।

गुरुर्ब्रह्मा गुरुर्विष्णु गुरुदेवो महेश्वरः ।

गुरुः साक्षात् पर ब्रह्म तस्मै श्री गुरवे नमः ।।

माता पिताजस्तै गुरुलाई पनि देवता समान मानी ‘आचार्यदेवो भव’ भनिन्छ । गुरु पूर्णिमाका दिन विद्यालयमा विभिन्न कार्यक्रम हुने गरेको थियो । तर यो वर्ष कोरोना महामारीका कारण त्यसो हुन सकेन । तथापी कतिपय ठाउमा सरकारले तोकेको स्वास्थ्य मापदण्ड पुरा गरेर व्यक्तिगत दुरी कायम गरेर पनि यो पर्वलाई मनाईने छ ।