औद्योगिक पुनरुत्थान गर्ने मौद्रिक नीति ल्याउन उद्योगीको माग

विराटनगर । सुनसरी मोरङ औद्योगिक कोरिडोरका उद्योगीहरूले अर्थमन्त्री जनार्दन शर्मालाई भेटेर औद्योगिक पुनरुत्थान हुनेगरी मौद्रिक नीति ल्याइनुपर्ने बताएका छन् ।

मोरङ व्यापार संघका अध्यक्ष प्रकाश मुन्दडाको अगुवाइमा गएको टोलीले अर्थमन्त्री शर्मालाई २१ बुँदे सुझावपत्र समेत बुझाएको छ । मुलुकको अर्थव्यवस्थाको सही जानकारीपछि बजेट कस्तो र कसरी ल्याउन सकिन्छ भन्ने विषयमा परामर्शमा रहेका अर्थमन्त्री शर्मालाई प्रदेश १ का उद्योगी व्यवसायीले अर्थ मन्त्रालयमै भेटेर आफ्नो धारणा राखेका हुन् ।

कोभिड १९ को प्रभावका कारण सबै ऋणीको ब्याज मिनाहा गरिनुपर्ने, कर्जा भुक्तानी गर्ने म्याद थपिनुपर्ने, हाल कायम रहेको बैंकिङ क्षेत्रको स्प्रेडदर अधिकतम ३ दशमलव ५ प्रतिशत कायम गरिनुपर्ने, क्रेडिट रेटिङका सम्बन्धमा पब्लिक लिमिटेड कम्पनीको हरुको हकमा ५० करोडकै सीमा र निजी कम्पनीहरूको हकमा २०० करोडको सीमा निर्धारणको व्यवस्था मौद्रिक नीतिमा समावेश हुनुपर्ने माग अर्थमन्त्री शर्मासँग उनीहरूले राखेका छन् ।

त्यस्तै उद्योगी÷व्यवसायीका लागि कर्जा, पुनर्कर्जा लिने प्रक्रिया सरलीकृत र सर्वसुलभ पहुँचको व्यवस्था गरिनुपर्ने, पुनर्कर्जाका व्यवस्था प्रभावकारी कार्यान्वयनमा ल्याइनुपर्ने, लकडाउनका कारण घाटा बेहोरेका एवं नकारात्मक प्रभाव परेका स्वदेशी उद्योग प्रतिष्ठानलाई आगामी तीन वर्षसम्मका लागि सूक्ष्म निगरानीमा नराख्ने व्यवस्था मौद्रिक नीतिमा गरिनुपर्ने माग गरिएको छ ।

सरकारद्वारा घोषित लकडाउनको अवधिका लागि बैंकहरूले लिँदै आएका सेवा शुल्क, नवीकरण शुल्क आदि खारेज गरिनुपर्ने र बैंक ग्यारेन्टी, प्रशासनिक आदि शुल्क घटाएर उद्योगी व्यवसायीको उधारो एवं पूँजी संरक्षण गर्ने स्रोतहरूको उपयोगितामा जोड दिन समेत माग गरिएको छ । कोभिडका कारण गम्भीर असर परेका एवं बन्द भएका पर्यटन, यातायात, होटल-रिसोर्ट, पोल्ट्री आदि क्षेत्रका लागि विशेष सहुलियतसहित न्यून दरमा कर्जा नवीकरण गरिनुपर्ने लगायत माग समेत उद्योगी व्यवसायीको छ ।

टोलीमा व्यापार संघका अध्यक्ष मुन्दडासहित वरिष्ठ उपाध्यक्ष नवीन रिजाल, पूर्व अध्यक्षहरू पवनकुमार सारडा र महेश जाजु थिए । यसैबीच, मोरङ व्यापार संघको टोलीले बिहीवार नै ऊर्जामन्त्री पम्फा भुसाललाई भेटेर विद्युत् समस्या समाधानका लागि आग्रह गरेको छ । पछिल्लो समय सुनसरी मोरङ औद्योगिक कोरिडोरमा विद्युत्को आपूर्ति अनियमित भएको छ ।

संघका अध्यक्ष मुन्दडा नेतृत्वको टोलीले ऊर्जामन्त्री भुसालसहित ऊर्जा सचिव देवेन्द्र कार्कीसँग भेट गरेर मोरङ–सुनसरी औद्योगिक कोरिडोरका उद्योगले विद्युत् आपूर्तिमा भोगिरहेका समस्याबारे ध्यानाकर्षण गराएका थिए । उक्त अवसरमा अध्यक्ष मुन्दडाले मोरङ-सुनसरी औद्योगिक कोरिडोर अन्तर्गत कटहरी गाउँपालिका सहित आसपासका क्षेत्रमा ३३ केभीए लाइन जडान रहे पनि हाल विद्युत् आपूर्तिमा ट्रिपिङ, न्यून गुणस्तर तथा अनियमित भएको बताएको आजको आर्थिक अभियान दैनिकमा समाचार छ ।