साझा कार्यक्रममा केन्द्रित हुँदै सत्ता गठबन्धन

काठमाडौँ । सत्तारूढ पाँच दलीय गठबन्धनले सरकारको न्यूनतम साझा कार्यक्रमको प्रारम्भिक खाका तयार गरेको छ । नेपाली कांग्रेसका महामन्त्री पूर्णबहादुर खड्काको संयोजकत्वमा गठित पाँच सदस्यीय कार्यदलका दुईवटा बैठकले नयाँ सरकारले जनहितमा गर्न सक्ने कामको खाका तयार गरेको हो ।

सरकार सञ्चालन, मन्त्रालय भागबन्डासहितका न्यूनतम कार्यक्रमका विषयमा प्रारम्भिक खाका तयार गरेको कार्यदलले केही दिनभित्र त्यसलाई पूर्णता दिने तयारी गरेको छ । सरकारको साझा कार्यक्रमसहित मन्त्रिपरिषद् विस्तारको गृहकार्यमा पाँच दलीय गठबन्धनका नेताहरू सक्रिय छन् । सोही क्रममा शनिबार साँझ पाँच दलीय कार्यदलले शीर्ष नेताहरूलाई सरकारको साझा कार्यक्रम निर्माणसहितका विषयमा अहिलेसम्म गरेका कामको जानकारी गराएका छन् ।

प्रधानमन्त्रीको सरकारी निवास बालुवाटारमा प्रधानमन्त्रीसमेत रहेका कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, जनता समाजवादी पार्टी (जसपा) का अध्यक्ष उपेन्द्र यादव, एमाले वरिष्ठ नेता माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसी सहभागी बैठकमा कार्यदलका संयोजक खड्काले कार्यदलले गरेको कामको ब्रिफिङ गरेका हुन् ।

कार्यदलले तयार गरेको प्रस्तावमा शीर्ष नेताहरूले केही विषय संशोधन र थप गर्न कार्यदललाई सुझाएका छन् । कार्यदलका दुईवटा बैठकले गरेको कामका विषयमा शीर्ष नेताहरूलाई ब्रिफिङ गर्ने काम भएको जानकारी दिँदै संयोजक खड्काले भने, ‘शीर्ष नेताहरूले जनहितमा सरकारले काम गर्नुपर्ने र त्यसका लागि प्रधानमन्त्रीलाई सुझाव दिनुभएको छ । ’देउवा प्रधानमन्त्रीमा नियुक्त भएपछि गठबन्धनको बैठकमा सहभागी हुन छाडेका एमाले नेता माधवकुमार नेपाल पनि सहभागी भए ।

शनिबार साँझको बैठकमा सहभागी शीर्ष नेताहरूले देउवालाई सामूहिक रूपमा भेटेर पहिलोपटक बधाई दिँदै पार्टी बैठक सरकारी निवासमा नराख्ने निर्णयको प्रशंसासमेत गरेका थिए । ‘पार्टीको बैठक सरकारी निवास बालुवाटारमा नराख्ने सानो काम तर त्यसको म्यासेज ठूलो छ,’ बैठकमा सहभागी नेताहरूको भनाइलाई उद्धृत गर्दै खड्काले भने, ‘यही तरिकाको म्यासेज दिने र जनताको हितमा काम गर्ने कुरामा तपाईं दृढ भएर लाग्नोस्, हाम्रो सहयोग निरन्तर रहन्छ ।’

कोरोनाविरुद्धको खोप र जनहितमा काम गर्दै सरकार र गठबन्धनलाई सफल बनाउने कुरामा नेताहरूले जोड दिएका थिए । सरकारको साझा कार्यक्रमलाई छिटो टुंगोमा पुर्‍याउँदै मन्त्रिपरिषद् विस्तार गर्ने पक्षमा नेताहरू रहेको स्रोतको दाबी छ । त्यसका साथै सरकारमा माधव नेपाल समूहको सहभागिताका विषयमा पनि छलफल भएको थियो ।

बैठकमा सहभागी शीर्ष नेताहरूले आ–आफ्ना दलभित्र र समग्र मुलुकका राजनीतिक अवस्थाका विषयमा चर्चा गर्दै त्यसलाई छिचोलेर देश र जनताको पक्षमा काम गर्नुपर्नेमा जोड दिएका थिए। त्यसअघि माओवादी अध्यक्ष दाहालले एमाले नेता नेपालसँग उनकै निवास कोटेश्वरमा भेटेको आजको नागरिक दैनिकमा समाचार छ ।