शेयर बजारमा भारी गिरावट

काठमाडौं, ९ भदौ । नेपाल स्टक एक्सचेञ्ज (नेप्से) आज बुधबार राताम्मे भएको छ । आज नेप्से ४८.४२ अंकले घटेर तीन हजार ७६ दशमलब ४५ विन्दुमा थामिएको छ ।

त्यस्तै, आज कारोबार रकममा पनि गिरावट आएको छ । आज १२ अर्ब ९ करोड २१ लाख बराबरको कारोबार भएको छ । मंगलबार १६ अर्ब १२ करोड ४४ लाख बराबरको कारोबार भएको थियो । आज कारोबार भएका सबै समूह घटेका छन् ।

नेप्सेका अनुसार आज कारोबार भएका कम्पनीहरुमा जीवन विकास लघुवित्त वित्तिय संस्था र आइसीएफसी फाइनान्स लिमिटेडको शेयरमूल्यमा सकारात्मक सर्किट लागेको छ । जीवन विकास लघुवित्त वित्तिय संस्थाको शेयरमूल्य ४२९.६० रुपैयाँले बढेर प्रतिकित्ता ४७२६.३० पुगेको छ भने आइसीएफसी फाइनान्स लिमिटेडको शेयरमूल्य १०६.९० रुपैयाँले बढेर प्रतिकित्ता ११७६.८० रुपैयाँ पुगेको छ ।

त्यस्तै, आज खानीखोला हाइड्रोपावर कम्पनीको शेयरमूल्यमा उच्च गिरावट आएको छ । आज खानीखोला हाइड्रोपावर कम्पनीको शेयरमूल्य ९.९८ प्रतिशतले घटेर प्रतिकित्ता ३५७.३० रुपैयाँमा झरेको छ ।