![](https://i0.wp.com/corporatekhabar.com/wp-content/uploads/2024/07/corporatekhabar-800x200-1.jpg?fit=800%2C200&ssl=1)
![](https://i0.wp.com/corporatekhabar.com/wp-content/uploads/2023/06/IME-Life-1200x100-1.gif?fit=1200%2C100&ssl=1)
काठमाडौं । विद्युत् नियमन आयोगका अध्यक्ष डा रामप्रसाद धितालले लघु जलविद्युत्का लागि सहज हुनेगरी आवश्यक ऐन, कानुन तथा नीतिनियमको व्यवस्था गरिने बताएका छन् ।
नेपाल नवीकरणीय ऊर्जा परिसङ्घले आज ललितपुरमा आयोजना गरेको अन्तरक्रियामा यस्तो बताएका हुन् ।
“लघु जलविद्युत्को उत्पादन, प्रसारण, वितरण र व्यवस्थापनमा उपभोक्ताका हितमा काम गर्छौं, आयोगबाट वैकल्पिक ऊर्जा क्षेत्रको प्रवर्द्धनका लागि महत्त्वपूर्ण काम गर्छौं,” उनले भने ।
अन्तरक्रियामा सहभागी सरोकारवालाहरूले लघु जलविद्युत्बाट दूरदराजका धेरै जनतालाई सहयोग पुग्नेगरी विद्युत् उत्पादन भएकाले यस क्षेत्रको प्रवर्द्धन गर्नुपर्नेमा जोड दिए ।
वैकल्पिक ऊर्जा प्रवर्द्धन केन्द्रका कार्यकारी निर्देशक नवराज ढकालले विद्युत् नियमन आयोगले वैकल्पिक ऊर्जा क्षेत्रको नियमन र भएका समस्यालाई समाधान गर्नुपर्ने बताए ।
“वैकल्पिक ऊर्जाका क्षेत्रमा नवीकरणीय ऊर्जा तथा ऊर्जा दक्षतासम्बन्धी विधेयक संसद्मा छ, यो हाम्रो प्रयासका कारण भएको हो, यसले राज्यका लागि महत्त्वपूर्ण कानुन बन्ने छ । वैकल्पिक ऊर्जा प्रवर्द्धन केन्द्रले माग र आवश्यकताका आधारमा ऊर्जा प्रवर्द्धनका क्षेत्रमा काम गरिरहेकै छ । आगामी दिनमा अझै प्रभावकारी रूपमा हामीहरू क्रियाशील हुनेछौँ”, उनले भने ।
विद्युत् नियमन आयोगका सदस्य डा मधुसूदन अधिकारीले जीवनको उर्वर समय नवीकरणीय ऊर्जा क्षेत्रमा बिताएको जानकारी गराउँदै ऐन, कानुन र नियमको व्यवस्थापन गरेरै भए पनि आयोगबाट वैकल्पिक ऊर्जालाई प्रवर्द्धन गरिने बताए ।
कार्यक्रममा लघु जलविद्युत्विज्ञ सुरेन्द्रभक्त माथेमा र कृष्ण देवकोटाले लघु जलविद्युत् आयोजनाको भविष्यका बारेमा प्रस्तुतीकरण गर्दै नेपालमा बनेका तीन हजार पाँच सयभन्दा बढी लघु जलविद्युत् आयोजनामध्ये हाल एक हजार आठ सयभन्दा बढी आयोजना सञ्चालनमा रहेको जानकारी गराए ।
सन् १९६० को दशकदेखि सुरु भएको लघु जलविद्युत् आयोजनालाई पछिल्लो समय सरकारले ध्यान नदिएको उनीहरूको गुनासो छ ।
–––
FACEBOOK COMMENTS